MPCC-in Ṭawngvaiah MNF MLA puh

Congress party chuan thuchhuah siamin, August 13, Thawhṭannia Mizo Hnam Runa inkhawmah MLA Lalruatkima'n Mizo­ram Institute of Medical Education and Research (MIMER) chu MNF sor­kar laia infrastructure an din anga a sawi chu nuihzatthlak an tih thu leh Lalruatkima chu a ṭawng­vai nasa hlea ah ngaih thu an tarlang.

MPCC chuan, Lalruat­kima'n MNF sorkarin infra­structure a din nia a sawi State Referral Hospital a nih a rinawm thu sawiin, "State Referral Hospital leh MIMER hian inzawmna thui tak nei mah se, thil hrang ve ve a ni. State Referral Hospital hi MNF sorkarin an tichingpen vek a ni tih hai der a, mipui laka an party tan hmingṭhat lak a tum hi nuihzatthlak leh zah theih loh thlak tak a ni," an ti.

Congress sorkar hmasak laia State Referral Hospital dinna tur sorkar laipui aṭanga cheng vbc. 40 chuang an dil chhuah hmangin MNF sorkar chuan kum 1999-ah hna an thawk a, damdawi-in ngai pawimawh hmasa loin quarters tur a buaipui hmasa tih sawiin MPCC chuan, "Tih hmasak loh tur an tih hmasak avangin damdawi-in sak chhunzawmna tur chu Central-in a pe duh ta lo a ni," an ti a; khum 500 awm theihna tura duan State Referral Hospital chu khum 50 awmna turin MNF sorkarin a chhuah thei hram tih an tarlang.