LADC-in Covid-19 dona tur an thawh
Lai Autonomous District Council (LADC) sorkar chuan nimin khan Covid-19 hripui donaa an district-a hman turin Lawngtlai DC Dr Andrew H Vanlaldika hnenah Rs. 3,00,000 an hlân a, Lawngtlai District Hospital Medical Superintendent hnenah Rs. 2,00,000 an hlân bawk.
LADC chief executive member (CEM) T Zakunga chuan, ramin hun harsa a hmachhawn mek tih sawiin, "Tun hi ṭan rual hun a ni. LADC sorkar chuan kan hmazawnah theihtawp chhuahin hma kan la a, budget session neih mai theih a nih loh avangin ṭanpuina pawh kan pe hma thei lo. DC thar kaihhruaina hnuaiah district administration leh LADC inkarah thawhhona ṭha a awm zel kan beisei," a ti.
Lawngtlai DC chuan, LADC-in hripui dona atan anmahni zâwna an thawh mek piah lamah, quarantine facility enkawlna leh ṭul danga ṭangkai taka hman theih tur ṭanpuina sum fai district administration kuta an hlàn leh chu lawmawm a tih thu a sawi a, "District administration leh district council inkarah thawhhona ṭha a awm phawt chuan hri dona chauh ni loin, hmasawnna kawng hrang hrangah kan district-in hmel thar a hmuh ka beisei," a ti a; district council leh district administration-te'n felfai leh awmze nei zawka hma an lakho dan tur an zawn a ṭul thu a sawi.