Independence Day ropui taka lawm a ni

India-in Britain laka zalenna a hmuhna ni, Independence Day chu nimin khan India ram pumah lawm a ni a; Mizoramah pawh state khawpui Aizawl bakah, district headquarters tin leh khua leh hmun dang ṭhenkhatahte lawm a ni.

Independence Day vawi 72-na hi Aizawlah chuan Lammualah hman a ni a, zing dar 9-ah chief minister Lal Thanhawla'n hnam puanzar a pawt pharh a, parade contingent-te'n hnam puanzar chibai an bûk a chháng lêt. Lal Thanhawla chuan, Independence Day-ah hian ram leh hnam tana inpekna thinlung pu thar leh ṭheuh turin mipui a sáwm.

Chief Minister chuan, Mizote chu sum ngaina hnamah an tlu lut ang tih a hlauhawm ber thu sawiin, "Bible-in 'Sum ngainat hi sual tinreng bul a ni,' a ti a. He ram chhiat ṭhatah te, hmasawnnaahte a mawhphurhtute kan ni a, kan mawhphurhnare ṭha taka khawtlang siamṭhat duhna rilru nen ṭan la thar ang u," a ti.

CM Lal Thanhawla chuan, a kaih­hruai sorkar hotute'n Mizoramah remna leh muanna a awm theih nan lal ṭhutthleng an nam thlu nia sawiin, "Hetiang hi khawvela la awm ngai lo a ni a, a awm leh ang em, tih pawh hriat a ni lo," a ti a; I-Day lawmnaa tel zawng zawngte chungah lawmthu a sawi.

NLUP chungchang sawiin Lal Thanhawla chuan, "NLUP hi Pathian lamṭang a ni a, sawichhiatna karah chhubgkaw tam tak rahbi tuksak an ni a, rangva in chung tur chhungkaw tam tak pek an ni. NLUP vang hian Lal Isua amah leh amah a inchawimawi a, Hindi tlimpui karah GSDP-ah India rama a ti ṭha ber state zingah kan tel tawh a ni," a ti.

NLUP vangin Mizorama mi tin sum lak luh chawhrual, per capita income pawh national average aiin a sâng télin a sang zawk nia sawiin CM Hawla chuan, "India ramah chaw khawpkham lo tlemna ber state kan ni," a ti a; India rama Mizoram dinhmun ṭhatna chuan Pathian lama ṭan a hlâwkzia a tichiang tih a sawi.

Chief Minister chuan, a kaihhruai sorkar hmalakna hrang hrang sawiin, medical college MIMER din a nih tawh thu leh MBBS seat awm zawng zawng hnawhkhah a nih tawh thu te, ṭhalaite tana khawvel thar siam turin sports infrastructure tam tak an siam thu leh MiMIR hmangin thil thar tam tak ruahman mek a nih thu te, Kawrpuichhuah thlenga rél kawng siam turin survey zawh a nih tawh thute a sawi a; "Lalpa'n thil ropui tak min tihsak a, lawm chunga a rawng bâwl mai loh chu tih tur kan nei lo," a ti.

Khawlphetha chungchangah Lal Thanhawla chuan, Tuirial Hydro Electric Power project siam zawh a nih tawh thu a sawi a, "Megawatt 42 pe chhuak thei tur Tuirini hydel project ruahman mek a ni," a ti a; ni zung chakna (solar energy) hmangin kawlphethaa intodelh turin solar power plant din mek a nih thu a sawi.

CM Lal Thanhawla chuan, ṭhalaite tan khawvel thar siam turin khelmual leh sports infrastructure hrang hrang siam an siam bakah, Mizoram Youth Commission hmangin nasa takin hmalak mek a ni a, Tuirialah NCC Academy siam mek a nih thute a sawi a; MYC-in remchanna a siamte chu hmang ṭangkai turin ṭhalaite a fuih.

Chief Minister chuan, Mizoramin ṭhalaite a nei ṭha a, ṭhalaite chu Mizoram resource pawimawh an nih thu a sawi a, "Khua leh tui ṭha, ram tana mi ṭangkai an nih theih nan nu leh pa an chawimawi a a ṭul a, Pathian thua kan hmuh angin nu leh pa chawimawite chu Pathianin a chawimawi ang a, malsawmna hnár a ni," a ti.

Lammuala Independence Day lawm­naah hian minister, MLA, sorkar hotu liante leh mipui ṭhahnem tak an tel a; Lammuala hun hman zawhah Raj Bhavan-ah Governor's At Home prog­ramme hman leh a ni a, Governor Kum­manam Rajasekharan-a'n sawm bikte tan thingpui ruai a buatsaih a ni.