Nula kutthlak MHIP-in an dem

MHIP Gen.Hqrs chuan nimin khan thuchhuah siamin, June 15, Thawhṭanni zana Laldawngliana, Khawzawl Dinthar Veng nia hriatin B Lalhlimmawii (25) d/o B Lalremtluanga, Tualpui chema a sât chu an dem thu leh, Laldawngliana (kum 36) chu dan anga a na thei ang bera hrem an phût thu an tarlang.

MHIP chuan, "Laldawngliana'n Lalhlimmawii chempuia a sât leh hliam na tak a tuar hi kan ngaithiam thei lo. A phû tâwk hremna hmu ngei se kan ti a, thuneituten dan anga na taka an hrem ngei kan phût tlat a ni. Mizo hmeichhiate chungah kutthlakna leh thihna a thleng fo hi a pawi kan tiin thleng tawh lo se kan duh tak zet," an ti a; Lalhlimmawii chu dam thuai turin duhsakna an hlân.

Tualpui mite hnen aṭanga thu dawn danin, B Lalhlimmawii hi Dulte khuaa a pute tlawh tumin a ṭhianpa nen June 15, 2020 khan an kal a, Khawzawl Zuchhip venga Engmawia inah innghatin zanriah an ei a ni. Zanriah ei kham, zan dar 7:30 velah Dulte lam pan turin in aṭangin an chhuak a, kawngpui an thlen hnuah theihnghilh an neih avangin amahin inah a kîr leh a, in aṭanga a chhuak leh chu Laldawngliana'n lo tidingin, chempuiin a hmaiah a sât a ni.

B Lalhlimmawii hliam tuar tlu chu kawng kalte'n hmuin an bawihsáwm a, Khawzawl damdawi-in panpui a ni a, a hmaia hliamte ṭhui a nih hnuah Champhai District Hospital panpui leh a ni.

Laldawngliana erawh chu a tlanchhia a, Khawzawl police-te'n zawng nghalin, June 15 zan zanlai velah an man a; June 16 zing khan Champhai District Court-ah hruai a ni. Laldawngliana hian Lalhlimmawii chu a nupui emaw tiin a sat niin police hnenah a sawi. Laldawngliana nupui chu Lalhlimmawii innghahna Engmawia fanu a ni.