Saituala I-Day lawmnaah mipui tel lo

Nimina Saituala Inde­pendence Day lawm­naa khuallian tur MLA Chalrosanga Ralte chu Saitual District Implementing Demand Committee (SDIDC)-in an dodal avangin a kal lo a; Saitualah hian SDO (Civil) hoin I-Day lawm niin, a lawmnaah mipui an tel lo.

Saitual Sub-Divi­sion chuan I-Day hi chawhma dar 11-ah sor­kar hnathawk, zirlai leh mipuite nena lawm turin ruahmanna a siam a, sorkar chuan khuallian atan Chalrosanga Ralte a ruat. Mahse, SDIDC-in district tipuitling tur an ngiatna kal meka Saitual mipuite chu I-Day lawm ve theiah an ngai lo a, mipuite chu tel lo turin an ngen a, an ngenna hi mipui pawhin an zâwm a ni.

Thu dawn danin, khuallian tur Chalrosanga Ralte hi Saituala kal turin inbuatsaih mah se, Saitual lama dan leh thupek kengkawhtute'n buaina a chhuah lohna a nih beiseia thuràwn an pek avangin a kal ta lo a; khuallian tur a kal tak loh avang leh mipuiin an telpui duh loh avangin Saitualah hian SDO (Civil) leh a staff-te chauhin zing dar 7:30-ah I-Day lawmna hun rei lote chhung an hmang a ni.