Lei chim chhan chhuina report sorkarin an zir chiang mek

Sesawng leh Khawruhlian inkara Tuirini lei, February 13, 2018-a a chim chhan chhui chiang tura din Magisterial Inquiry, Aizawl DC Dr A Muthamma kaihhruaiin report an thehluh chu sorkarin a zir chiang mek.

Turini lei thar dawh mek a nih laiin February 13, 2018-ah mi pahnihin an zawh laiin a chim a, mi pakhat a thi. Lei chim tlaia Home Minister hoa sorkar mi pawimawhte ṭhukhawm chuan, lei chim chhan dik tak chhui chhuak tura Aizawl DC kaihhruai Magisterial Inquiry din an rél a ni.

Magisterial Inquiry hian May 23, 2018-ah PWD secretary Lalram Thanga hnenah report a thehlut a; Indian Institute of Technology (IIT), Guwahati-a mithiamte'n an zirchianna erawh chu IIT lamin an la peih loh avangin thehluh tel a ni lo.

Nimina Vanglaini palai zawhna Aizawl DC-in a chhan danin, IIT, Guwahati-in an report an thehlut tawh a, chu chu PWD Secretary hnenah an thehluhna a rei leh deuh tawh a ni.

Nimin vek khan Vanglaini palai chuan PWD Secretary chu Magisterial Inquiry report chung­changa an hmalak dan a zawt a, "Kan zir chiang mek," tiin a chhang a ni.