District hrang hrangah I-Day lawm a ni

Nimin khan Mizoram hmun hrang hrangah Independence Day vawi 72-na lawm a ni a, minister leh MLA-te'n hmun hrang hrangah an hmanpui. I-Day hi MIzorama district khawpui tinah lawm a nih bakah, Civil SDO leh BDO ṭhuthmun khaw ṭhenkhatahte lawm a ni a; zirna-in ṭhenkhatte'n anmahni hmunah an lawm bawk.

Lunglei

Lungleiah chuan Ṭhuam­luaia Mualah minister John Rotluangliana hoa lawm a ni a, parade contingent 24-te'n hnam puanzar chibai an bûkna a chháng let. John Rotluangliana chuan, hnam pa Mahatma Gandhi, Pandit Jawaharlal Nehru, Sardar Vallabhai Patel leh mi dangte inhlanna an hre reng tih sawiin, zalenna neih theihna tura India ram dintute beisei leh hmathlir hlen chhuak tura inhlân thar turin mipui a sáwm.

Lungleiah hian I-Day pualin badminton, basketball, snooker & billiards, tennis, carrom board, table tennis, karate leh foot­ball-ah inelna buaitsaih a ni.

Siaha

I-Day hi Siahaah chuan District Playground-ah lawm a ni a, khuallian minister H Rohluna'n parade contingent 15-te'n hnam puanzar chibai an bûk a chháng let. H Rohluna hian thu sawiin, Mizoram sorkar leh MADC sorkar hmalakna hrang hrangte a tarlang.

Siaha-ah hian I-Day pual­in football leh volleyball tour­nament buatsaih a ni a, nimin khan final khelh a ni.

Champhai

Champhaiah chuan mi­nister Zodintluanga hoin Chhang­phut Field-ah lawm a ni a, khuallianin hnam puanzar pawtpharhin, parade contingent 18-te'n hnam puanzar chibai an bûk a chháng let. Zodintluanga chuan, zalenna neih theihna tura tha thawhtu te, nunna chánte leh hun harsa tak ramin a paltlang dante hre reng ṭhin turin mipui a chah a, "India hi mahni ro inrel ram a ni a, harsa taka zalenna neih hi vawn nung zel a ṭul. Zalenna vangin India ramin hmalam a pan a, khawvela ram ṭhang duang ber pakhat a lo ni thei ta," a ti.

Champhaiah hian chawhnu lamah District Football Association buatsaih I-Day Football Tournament final khelh a ni a, final-ah hian Vengsang FC leh Venglai FC an intum a ni.

Kolasib

Kolasib-ah chuan I-Day hi Kolasib Sports Stadium-ah lawm a ni a; khuallian, Assembly speaker Hipheia'n hnam puan­zar pawt pharhin, parade contingent-te'n hnam puanzar chibai an bûk a chháng.

Speaker chuan, India ram zalenna atana inpe zo hruaitu ropui tak takte leh nunna hlantute hre reng turin mipui a chah a, "Anmahni vangin tun dinhmun hi ka thleng thei a ni," a ti.

Serchhip

I-Day hi Serchhipah chuan minister of state Vanlalawmpuii Chawngthu hoin Khawtetlang Field-ah lawm a ni a; khuallian hian hnam puanzar pawt parhin, parade contingent-te'n hnam puanzar chibai an bûk a chhang. Vanlalawmpuii chuan, zalenna zarah India ram chu kum rei lo te chhungin khawvela ram thil ti thei berte zingah a tel thu sawiin, "Mizoram pawhin zalenna zár zoin, chak takin hma a sawn zel a, kan state hi India ram state zinga mipui sum lak luh pun chakna ber pawl a ni," a ti.

Serchhipah hian I-Day pualin Serchhip khawpui huam chhunga home leh damdawi-inte hnena thilpek hlan a ni.

Lawngtlai

Lawngtlaiah chuan AOC Veng khelmualah lawm a ni a, minister C Ngun­lian­chunga khuallian a ni. C Ngunlian­chunga chuan, India ramin ram dang mite awp behna aṭanga zalenna a hmuh theih nana hma latu mi huai kal tate zahna chibai bûkin, kum 2022 hmaa New India hmathlir hlawh chhuak thei turin ram hmasawnna leh mipui hamṭhatna hnathawh hrang hrangah sorkar thawhpui zel turin mipui a chah.

I-Day pualin Lawngtlai District Independence Day Celebration Committee chuan Lairam Motherless Home leh District Jail-ah te ṭanpuina Rs. 2,000 ve ve an hlan.

Mamit

I-Day hi Mamitah chuan minister Lalsawta hoin GSA Playground-ah lawm a ni a, parade contingent 17 an awm. Lalsawta hian I-Day pual hian Mamit District Hospital, District Jail leh Mamit khaw­puia home hrang hrang a tlawh a, thilpek a hlan.

Mamitah hian I-Day pualin football, volleyball leh badminton-ahte intihsiakna buatsaih a ni.