Hmalakna hrang hrang thlir lêt

Mamit District Water & Sanitation Mission chu nimin khan an chairman Dr Lalrozama, district bawrhsap hoin DC conference hall-ah an ṭhukhawm a, hmalakna hrang hrang thlir lêtin, hmalak zel dan tur an sawiho nghal.

PHE SDO V Laldanmawia chuan, Jal Jeevan Mission (JJM) thil tum leh a nihphung tlangpui a sawifiah. Meeting-a tarlan danin, JJM thil tum ber chu kum 2024 ral hmaa in tinin functional house tap connection (FHTC) hmanga ni tin tui litre 55 an neihna tura hmalak a ni.

FHTC hi Mamit district-ah nikum aṭang khan kalpui ṭan tawh a ni a, Dilzawl, Suarhliap, Khan­tlang leh Ailawng khuaa chhungkua 438-ah FHTC pek tawh a ni. Heng khaw palia sikul, anganwadi, health center leh community hall-ahte pawh FHTC pek vek a ni bawk.

Meeting-ah hian kum 2020-21 chhunga Annual Action Plan thlirho niin Mamit district chhunga khaw 18-a in 2,999-te FHTC pek tura ruahmanna siam an pawm.

Khaw 18 zinga khaw pariat, tun dinhmuna tui hnianghnâr la nei lo - Pukzing Vengthar, Zopui, Khanṭhuam, Chuhvêl, Nàlzáwl, N. Tlangkhang, Chilui leh Damdiai-te chu ngaih pawimawh hmasak turin an ti a; heng khuate hi Aspirational District ranking-a Mamit district pawt hniamtute an ni.