Aizawl City Bus driver leh conductor mi 205-te swab sample lak a ni

Aizawl city bus driver leh conductor-te chu Covid-19 an kai leh kai loh RT-PCR hmangin enfiah a ni dawn a, nimin khan R Dengṭhuama Hall-ah an swab sample lak a ni.

Aizawl City Bus Owners Association (ACBOA) hruaitute sawi danin, tun hnaiah state páwn aṭanga rawn hawte phurtu MST bus conductor pakhat Covid-19 vei hmuh chhuah a nih avangin, phai aṭanga rawn hawte phurtu city bus driver leh conductor zawng zawng chu swab test tura ruahman a ni a; nimin khan R Dengṭhuama Hall-ah driver leh conductor mi 205-te sample lak a ni.

ACBOA hruaitute chuan, city bus driver leh conductor-te chu a tìrah rapid antibody (RAT) hmanga endik vek tawh an nih thu an sawi a, "Driver leh conductor-te hian phai aṭang rawn hawte an phurh kualnaah fimkhur takin thil an kalpui a, hri léng laka an him theih nan passenger-te leh an bungruate an khawihpui ngai lo. Driver ṭhutna hnungah sarâng zàr vek a ni a, driver kawngkhar aṭangin an chhukin an lut ṭhin," an ti.