Lungleia RT-PCR Lab. hman a la ni lo ; Lab. hawn hnuah sample 6,218 endik tawh

Lunglei Tourist Lodge, Zotlanga RT-PCR laboratory chu December 30, 2021 khan hawn ni tawh mah se, tun thlengin swab sample endik nan hman a la ni lo. RT-PCR laboratory hawn a nih hnuah Rapid Antigen Test (RAT) leh TrueNAT hmangin Lunglei district bikah swab sample 6,218 endik a ni tawh.

Lunglei aṭanga thu dawn danin, Lunglei Civil Hospital (LCH) medical superintendent Dr SR Ngurchamliana chuan, Lungleia RT-PCR khawl bun tawh chu an mentor (kaihruaitu) NEIGRIHMS, Shillong duh danin enchhinna (trial run) kalpui mek a nih thu leh tun kar chhungin thil engkim a fel theih an beisei thu a sawi.

LCH Medical Superintendent chuan, RT-PCR khawlin sample endikah result a hmu dik ngei em tih te, khawl dangte nen an inmil ṭha em tihte en mek a nih thu a sawi a; laboratory-a thawktu tur mamawh ang zat tur tihfel tawh a nih leh nih loh zawhna chu, ruahman fel a la nih loh thu leh TrueNAT laboratory-a thawkte'n an enkawl rih mai tur thu a sawi.

December 30, 2021-a Lungleia RT-PCR laboratory bun thar hawn a nih hnu, December 31 aṭanga January 10, Thawhṭanni thleng khan Lunglei district bikah swab sample 6,218 endik a ni tawh a, a tam ber, 90% vel chu Rapid Antigen Test hmanga endik a ni.

Lungleia RT-PCR laboratory bun thar chu December 30, 2021 khan Health & Family Welfare minister Dr R Lalthangliana'n a hawng a; Minister chuan, RT-PCR lab. hawn tâk chu Mizoram chhim lam district-te tan hmasawnna méllung pawimawh tak a nih thu a sawi.

Sorkar thuchhuaha tarlan danin, Lungleia RT-PCR lab. bun thara an khawl hman chu MLA Zodintluanga Ralte-in a pek, Thermo Fisher 7500 RT-PCR khawl a ni a, December 10, 2021-ah service engineer hoin ZMC Microbiology department-a head of department Dr Swagnik Roy ten hlawhtling takin enchhinna (trial run) an lo nei tawh.

Laboratory bunna tura hna thawh chu September 22, 2021-ah ṭan a ni a, November 21, 2021-ah zawh hman tura tih ni mah se, October 28, 2021-ah zawh a ni.

Lab. bunna hmun Tourist Lodge building thawm ṭhat nan cheng nuai 66.65 hman a ni a; 'India COVID-19 Emergency Response & Health System Preparedness Package: Phase-II (ECRP-II package)' hnuaia cheng nuai 30 hmuh aṭangin laboratory mamawh bungrua leh thil hrang hrang leina atan cheng nuai 23.89 hman a ni bawk.