Aitlang hmuna ram neitute'n Assam Police an dawr dawn

Vairengte Aitlang hmuna ram neitu zinga Assam police-in an vèn china ram neitute chuan, an hmunphiahte an seng theih nan Vairengte khawtlang hruaitute nena Assam police hotute dàwr an rêl.

Aitlanga ram neitute hi January 10, 2022 zan khan Vairengteah an ṭhukhawm a, "Khawtlang hruaitute kaihhruaina hnuaiah Assam police duty-te dàwr mai ni se kan ti. January 11-ah Vairengte SDO (Civil) a huhoa dàwrin, January 12-ah Assam police-te a huhoa va biak mai ni se," an ti.

An rorel ang hian Aitlanga ram neitute chuan nimin khan Vairengte SDO (C) an hmu a, vawiin hian an ramah boruak thlithlai tura kal an tum. Ram neitute chuan, an hmunphiahte an hralh hmain a hmuna hmuh an duh tih an sawi.

Aitlanga ram neitute chuan Vairengte Joint YMA hruaitute pawh an kâwm a, sorkar thu ngaichâng deuh tura an lo tih rualin, puih erawh an inpeih reng thu an lo hrilh.

Ram neitute chuan, an thil tum chu ramri buaina lam a ni lo tih sawiin, "Kan huan thlaite hralh ngei kan duh. Chumi atan chuan sorkar thuneitu sang zawk lam pawhin buaina awm loa hma kan lâk theihna turin min pui se kan duh ber a ni," an ti.

Aitlanga ram neitute hnen aṭanga Vanglaini thu dawn danin, Assam police-te an inkulh avang hian mi 18 chuan an ram an chán mek a ni. Anni bakah hian Assam police-te'n an hmuh phâk chiah loha ram nei eng emaw zat an awm a, anni pawhin an ramah hna an thawk ngam bik lo a ni.