Cheng nuai 54.7 sênna tura ruahman Chakai farm-ah hlawhtlinna la hmu lo

Fisheries department-in Socio-Economic Development Programme (SEDP) hnuaia cheng nuai 54.7 sênna tura an ruahman, Dumlui, Kolasib-a chakai farm kalpui mek chu a hlawhtlinna hmuh tur a la awm lo.

Dumlui, Kolasib-a Pilot Project on Crab Culture hi March 2020 aṭangin enchhinna kalpui ṭan a ni a, chakai chi ṭha lak khawm a, chi thlah tura dah khawmna tura tih a ni. Kolasib District Fisheries Officer pisa leh ICAR, Kolasib Regional Center-a mithiamte'n an vil a, rearing pond chakai 30,000 vel khawi theihna tur a awm.

Vanglaini palai zawhna chhangin Fisheries department hotute chuan, chakai farm-ah hian hlawhtlinna hmuh tur a la awm loh thu an sawi a, "Hlawhtlinna a awm dawn nge dawn lo kan hre bik lo. Pawisa chu Kolasib DFDO-in a tahtawlin a pe ṭhin," an ti.

Fisheries department hotute chuan, Dumluia chakai farm kalpui chu enchhinna (pilot project) a nih thu sawiin, "Tun dinhmunah chuan hmun danga kalpui tumna a awm rih lo," an ti a; Dumluiah hian a hlawhtlin chuan ngaihtuahna thar siam theih a nih tur thu an sawi.

March 3, 2021 khan Assembly House-ah Fisheries minister K Lalrinliana chuan chakai farm hnuaia hnate chu department work-a thawh a nih thu a sawi a, "Chakai farm siam tur hian department chuan theih ang tâwkin an zir a, kan ramah siam theih ngei a nih rin a ni. India ramah Kerala, Tamil Nadu, West Bengal, Karnataka, Andhra Pradesh, Maharashtra, Goa, Gujarat leh Odisha-ahte chakai farm siam a ni tawh," a ti.

Mizorama chakai ang chi chu India ramah a khàwina hmun (farm) din hriat a nih loh thu sawiin Fisheries Minister chuan, "Chuvangin, India ram hma hruaitu ni turin pilot project anga enchhinna atan hmalak mek a ni," a ti a; project chu a hlawhtlin theih chuan Mizoram economy chawi kânna atan bul ṭanna ṭha tak a nih an beisei thu a sawi a ni.