Kolasib-ah Handloom Expo buatsaih

Mizoram Handloom & Handicrafts Develop­ment Corporation Ltd. (ZOHANDCO) chuan nimin aṭang khan Taitesena Hall, Kola­sib Venglaiah State Hand­loom Expo 2022 an buatsaih a, minister of state K Lalrinliana'n a hawng.

K Lalrinliana chuan, State Handloom Expo chu Mizote hnam ziaráng pho chhuahna remchang a nih bakah, thiamna leh theihna hmanga siam hnam thuamte ram páwn thleng pha sumdawnna kawng sah kuakna hmanraw ṭangkai tak a nih theih thu a sawi a, "Chumi tur chuan a siamna hmanrua leh bungrua siam kawngah intodelh tura ṭan lak a ngai," a ti.

State Handloom Expo chu puantah leh thiamhnáng lama tui mite tihphûr zual nan leh ṭhangtharte tan tuina thar petu a nih ngei theih nan K Lalrinliana chuan duhsakna a hlân a ni.

ZOHANDCO chair­man C Lalrammawia pawhin thu sawiin, puantah leh thiamhnáng lama hmalakna kalpui dante a tarlang a, "Mizo puan panga chu GI tag tih tawh a ni a, a dangte pawh tih chhunzawm tura hmalak mek a ni," a ti.

National Handloom Development Programme (NHDP) kaltlanga buatsaih Handloom Expo-ah hian stall 34 awmin, Mizo kutchhuak hnam thuam chi hrang hrang pho chhuah a ni. Kum 2021-22 chhungin Aizawl leh Mamitah State Handloom Expo buatsaih leh tum a ni bawk.