KHAWTHLIR

DC-in ruahman
Aizawl Bawrhsap Pisapui kângin District Emergency Operation Centre (DEOC) biakpawhna telephone hrui a tihchhiat avangin Aizawl DC Dr Lalhriatzuali Ralte chuan DEOC biakpawh theihna tur a ruahman. Aizawl DC pisa control room chu 9436453580, Aizawl West CMO control room chu 8014126549 leh Aizawl East CMO control room chu 8014050504-ahte eng lai pawhin biak theih a nih thu a tarlang.

Filling station thar
Champhai North bialtu MLA Dr ZR Thiamsanga chuan nimin khan New Champhaiah Indian Oil Corporation Ltd. kaltlanga siam Ramsanga Filling Station a hawng. Filling station thar hi Champhaia petrol pump palina a ni.

Dy Speaker-in hripui vei tamna a tlawh
Assembly deputy speaker Lalrinawma chuan nimin khan a bial Tuikum chhunga tun hnaia Covid-19 hluarna Hualtu leh Hmunṭha khuate a tlawh a, village task force hruaitute nen hmalak dan tur an sawiho bakah, hripui veite enkawlna community covid care centre a tlawh. Covid-19 vei Hualtu khuaah mi 84 leh Hmunṭha khuaah mi 36 an awm mek a ni.

MLA-in laptop pe
Aizawl South-I bialtu MLA C Lalsawivunga chuan Mizoram Youth Commission-in December 17, 2021-a Mega IAS Scholarship Exam result a tihchhuaha a bial chhung mi inziak tling mi pahnih hnenah January 10, Thawhṭanni khan laptop a pe. C Lalsawivunga hi Covid-19 vanga State Referral Hospital-a enkawl mek a nih avangin a aiawhin bialtu councillor R Lalawmpuii leh a personal assistant-te'n an hlàn a ni.

Restricted area
Thenzawl East VC huam chhungah Covid-19 vei an pun zel avang te, hripui darh zel tur vênna atan nasa zawka hmalak a ngaih avang leh mumal leh chak taka sûlhnu chhui a ngaih avangin Serchhip DC Kumar Abhishek chuan Thenzawl East VC huam chhung hi nimin chawhnu dar 1 aṭang khan tlawhpawh phal loh (restricted area) a nih thu a puang.