CM-in food storage depot tur a tlawh

Chief minister Zoramthanga chuan nimin zing khan Sairang Dinthara Food Corporation of India (FCI) hnuaia buhfai metric ton 10,000 dawng thei tur food storage depot sak tura buatsaih mek a tlawh a; hna a tam thei ang ber ṭhál laia thawh zawh tum turin thawktute a chah.

CM Zoramthanga chuan, hna thawktute chu ṭhál laia hna a tam thei ang ber thawk tura a chah rualin, electricity leh mamawh dang state sorkar nen indawra enho ngaite pawh bawhzui thuai turin a kaihhnawih state department hotute a hrilh.

Food storage depot hi Central PWD hnuaiah Eastern Trading Corporation-in an sa a, June 2021 khan hna thawh ṭan niin, kum hnih chhunga sak zawh tura ruahman a ni.

Chief Minister hi FCSCA minister K Lalrinliana leh AMC deputy mayor R Thanglura bakah, FCSCA, PWD, Power & Electricity, CPWD leh FCI hotute'n an ṭawiawm a ni.