MLA in hnathawhte a enfiah

Aizawl South-III bialtu MLA Prof. F Lalnunmawia chuan nimin khan a biala khaw pathum - Phulpui, Sateek leh Aibawk khuate a tlawh a; khawtlang hruaitu leh zirtirtute nen inkâwmin, khawtlang hmasawnna tur leh zirna hmasawn dan tur a sawipui a, hmasawnna hna thawh mekte a en bawk.

F Lalnunmawia chuan, "Kum hnih chhung hri léng vanga SEDP kalpui theih a nih loh hnuah sorkar kum thar aṭangin kan kalpui thei tur hi a lawmawm hle a ni," a ti.

Aizawl South III huamchhunga hmasawnna hnathawh mek chungchang sawiin Bialtu MLA chuan, "Kan bial chhunga development hnathawh mekte a theih chin chinah kan en nghal zel. Hna ṭha taka thawh kan tum zel tur a ni," a ti a, khawtlang tana rotling nei turin hna vil kawngah pawh khawtlang hruaituten ṭan la zel se a duh thu a sawi.