Covid-19 vangin mi 564 thi tawh

Nimin khan tlai dar 5 thlengin Covid-19 vangin mi pahnih an thi a, January 10, Thawhṭanni zan khan mi pakhat a thi bawk. Mizoramah hripui vangin mi 564 an thi tawh a, tun January thla bikah mi 18 an thi tawh.

January 10, Thawhṭanni zan dar 9:30 khan Thanglianpuii (76), Siaha chu hripui vangin State Referral Hospital-ah a thi a; Covid-19 vei a ni tih December 31, 2021 khan hmuh chhuah niin, hemi ní hian SRH-ah dah luh a ni.

Nimin zing dar 7:20 khan R Lalnunkima (57), Zawlnuam, Mamit district chu SRH-ah a thi a, Covid-19 positive a ni tih December 16, 2021 khan hmuh niin, December 22 aṭangin SRH-ah enkawl a ni. Lalremtluangi (42), Chhingchhip, Serchhip district pawh nimin zing dar 8:05 khan SRH-ah a thi a, Covid-19 vei a ni tih December 7, 2021 khan finfiah niin, December 15-ah SRH-ah dah luh a ni.