ASF vanga vawk thi zat 29,824

12th January, 2022

Vawk pùl hri, African Swine Fever (ASF) avangin Mizoramah vawk 29,824 a thi tawh a, December 30, 2021 hnuah ASF vanga vawk thi a awm tawh lo.

ASF vanga vawk thi hi a tlahniam zel a, tunkum February thla hian AH&Vety department chuan ASF vanga vawk thi buaipuina leh a kaihhnawih thilte hi an chinfel theih tawh an beisei a ni.

Lungsen khuaah March 2021 aṭang khan chhan hriat loha vawk thi awm ṭanin AH&Vety department chuan zirchian hna an thawk nghal a; April 15, 2021 khan sorkar laipuiin Mizoramah ASF hri a léng tih a puang a ni.

Kum 2021 chhung khan district 11-a khua/veng 272-ah ASF vang hian vawk 29,824 a thi a, AH&Vety department hriatpuinain vawk 10,381 suat a ni bawk.

AH&Vety department hriatpuinaa vawk suat neitute tan Mizoram sorkar chuan sorkar laipuiah zangnadawmna a dil sak a, sorkar laipui hian zangnadawmna an rawn pek dawn leh dawn loh hriat ala ni lo.