Covid-19 vaccine precaution dose Mi 664 hnenah pek a ni tawh

January 10, Thawhṭanni aṭang khan India ramah healthcare worker, frontline worker, kum 60 chin chung lam leh natna benvawn (comorbidity) nei zinga Covid-19 vaccine dose hnih la tawhte hnenah precaution dose pek ṭan a ni a, Mizoramah pawh pek ṭan nghal niin, Thawhṭanni khan mi 664 hnenah pek a ni.

Covid-19 precaution dose hi vaccine la kim tawh leh dose hnihna an lâk aṭanga thla kua (ni 270) liam tawh chin leh Cowin-a thun luh sate chauhin an dawng thei a; natna benvawn nei, precaution dose la duhte chu anmahni doctor ráwn tur leh doctor thuràwn anga awm tura chah an ni. Mizorama Covid vaccine pek chi hnih Covishield leh Covaxin chu lak pawlh phal a ni lo a, precaution dose la turte pawh a hmaa vaccine an lak ang chi chauh lâk phal a ni.

Health department-in district a ṭhenah Champhai district tih loh district dang zawngah sorkar hmun ruahman aṭangin Thawhṭanni khan precaution dose 636 leh private facility aṭangin dose 28 pek a ni a; healthcare worker mi 379, frontline worker mi 158 leh kum 60 chung lam mi 127-te niin, an vaiin mi 664 an ni.

Kum 15-18 inkar mi 22,347 hnenah January 3-10, 2022 chhung khan Covaxin pek a ni tawh a; January 10 bikah chuan Aizawl East district-ah mi 890, Aizawl West district-ah 2,372, Lunglei district-ah 1,099, Siaha district-ah 375, Champhai district-ah 1,613, Kolasib district-ah 579, Serchhip district-ah 608, Lawngtlai district-ah 745 leh Mamit district-ah 291 pek tawh niin, a vaiin mi 8,572 hnenah pek a ni.

January 10, 2022 thleng khan Mizoramah kum 18 chung lam hnenah Covid-19 vaccine dose 13,31,017 pek a ni tawh a, kum 15-18 inkarte hnena pek tawh nen a vaiin dose 13,53,364 pek a ni tawh. Vaccine la tawh zawng zawng chu mi 7,56,980 an ni a, an zinga mi 5,95,720 chuan dose hnihna an la tawh a, la kim tawh hi first dose la tawh aṭangin 78.69% a tling.