Home Minister-in ṭanpuina a hlân

Home minister Lalchamliana chuan a bial, Hrangturzo huam chhunga khaw pathum hnenah Covid-19 vei mek an tam avangin nimin khan ṭanpuina a hlân.

Lalchamliana hian ṭanpuina hi Bungtlang khua hnenah Rs 40,000, Pilêr hnenah Rs 20,000 leh Biate hnenah Rs 10,000 a hlan a, a hmain East Lungdar, Mualchéng leh Sailulâk khuate hnenah ṭanpuina a lo pe tawh bawk.

Hrangturzo biala khaw 17 zinga khaw pakuaah tun hnaiah Covid-19 hripui a darh mek a, hripui vei tawh zawng zawng chu mi 812 an ni a, mi 57 chhuak tawhin, mi 755 enkawl mek a ni.

Lalchamliana chuan, a bialah hripui vei an awm belh zel chu pawi a tih thu a sawi rualin, damdawi-in lama thawktute leh village task force hruaitute'n thawhhona an neih ṭhat thu a sawi a; sorkarin inkaihhruaina a siamte ngai pawimawha zâwm turin a bial mipui a ngen.