Hripui vei awmna khuate tlawh

Khawzawl DC ruahmannain Covid-19 zonal officer-te chuan tun hnaia Khawzawl district-a Covid-19 vei hmuh chhuahna khaw 15 an tlawh a, village task force-te nen inkâwmin, a ṭul angin ṭanpuina pawisa an hlân.

Zonal officer-te hian Covid-19 vei tam chhan leh vei mekte enkawl an nih dan a hmunah an enfiah a; VTF leh khawtlang hruaitu dangte nen inkawmin, hripui donaa an mamawh leh hmalak zel dan turte an sawipui.

Hripui vei awmna chhungkuate'n eibàr zawnnaa harsatna an tawh theihte pawh zawh chian niin, community covid care centre-te a hmunah an tlawh a, hmanraw mamawhte an endik nghal bawk.

Khawzawl district-ah hian Kawlkulh, Puilo, Chhawrtui, Rabung, Aiduzawl, Khualen, Khawhai, New Chalrang, Chalrang, Lungtan, Biate, Sialhawk, Chawngtlai leh Tualte khuaahte tun hnaiah Covid-19 vei eng emaw zat hmuh chhuah a ni.