Ni 96 hnua hripui vei hmuh tam ber ní a thleng

January 10, Thawhṭanni khan Mizoramah Covid-19 vei mi 1,513 hmuh chhuah a ni a, October 4, 2021 hnua hmuh tam ber ní a ni. Nimin khan hripui vei dam tawh mi 149 chhuahtir an ni a, hripui vangin mi pahnih an thi.

Covid-19 vei Thawhṭannia hmuh chhuahte chu mipa 648 leh hmeichhia 865 an ni a; ZMC laboratory-a hmuh 98, TrueNAT hmanga hmuh 46, RAT hmanga hmuh 1,363 leh FIA hmanga hmuh paruk niin, positivity rate chu 17.85% a ni.

Hripui vei hmuh thar 1,513 chu ni 96 (October 4, 2021) hnua hmuh tam ber ní a ni a, nikum October 4 khan mi 1,681 hmuh chhuah a ni. Positive hmuh tam ber ní September 27, 2021-ah mi 1,846 hmuh a ni thung. Mi 1,513 zinga 1,081 (71.45%) chuan symptom an nei a, mi 432-in symptom an nei lo.

IPR tarlan danin, hripui vei mi 20 aia tam hmuhna khuate chu - Rabungah mi 175, Rúllàmah 68, Lungtanah 54, Lungseiah 52, Chungtlangah 49, Mualphengah 48, Ngèntiangah 35, Kawlkulhah 31, New Chalrángah 30, East Lungdarah 28, Biate-ah 24, Saitualah 25, Sazêpah 23 leh Lungpho-ah 21 an ni a; Lungsei leh Sazêp khua tih loh khaw dang zawnga mite chu symptom nei vek an ni. Khawzawl district-a sample endik 375-te an positive vek bawk.

Sample endikna district 11 zingah positivity percentage 10% aia a sànna district pariat a awm a, a sànna ber Khawzawl district-ah 100% a ni. Positivity rate 10% chung lam district dangte chu Saitual 42.47%, Champhai 24.26%, Hnahthial 23.68%, Serchhip 17.93%, Mamit 16.06%, Aizawl 14.84% leh Lawngtlai 10.90%-te a ni.

Nimin tlai dar 5 thleng khan hripui vei dam tawh mi 149 chhuahtir an ni a; district tina chhuak zat chu - Champhaiah 59, Aizawlah 40, Mamitah 26, Serchhipah 11, Lungleiah paruk, Kolasib-ah pathum, Lawngtlai leh Saitualah pahnih ve ve a ni.

IDSP record angin, Mizoramah Covid-19 vei 1,47,558 hmuh chhuah a ni tawh a, mipa 70,818 leh hmeichhia 76,740 an ni. Nimin tlai dar 5 thleng khan mi 1,41,235 (95.71%) chhuahtir an ni tawh a, mi 564 (0.38%) thi tawhin, enkawl mek mi 5,759 (3.91%) an awm.

Kum 2011 chhiarpui aṭanga chhûtin, Mizorama Covid-19 vei hmuh tawh 1,47,558 chu mi 1,000 zelah hripui vei mi 134 an awm ang a ni a; mi 1,00,000 zela Covid-19 vangin mi 51 an thi tawh ang a ni tih sorkar thuchhuakin a tarlang.

Mizorama swab sample endik tawh zawng zawngah RT-PCR hmanga endik zat percentage ni tin a tlahniam hret hret zel a, RAT hmanga endik zat a pung zel thung. January 10, 2021 thlenga swab sample endik tawh 15,49,311 aṭanga RT-PCR hmanga endik zat percentage chu 21.45 a ni a, RAT hmanga endik zat chu 72.74% a tling.