ZPM-in Zoram siamṭhatna khawmpui buatsaih ; Politics-ah Pathian ram a thleng tur a ni - Duhoma
Ṭangrual pawl, Zoram Peoples’ Movement (ZPM) chuan nimin khan Vanapa Hall-ah 'Zoram siamṭhatna khawmpui' an hmang a; ZPM chief ministerial candidate Lalduhoma'n thu sawiin, "Ram rorelna kawngah hian Pathianin duh thlan tur chi hnih min pe a, nunna leh thihna, malsawmna leh anchhia a ni... Zoram politics-ah Pathian ram a thleng tur a ni," a ti.
Lalduhoma chuan, Mizoramah natna hlauhawm chi hrang hrang - cancer, AIDS tihte a hluar mek tih sawiin, "MSACS Report-a tarlan ang chuan, thisen test zawng zawng zinga 2.46% chu HIV+ve an ni a, December 6, 2017-a National AIDS Control Organization (NACO) Sentinel Surveillance-ah chuan India mihring zinga 0.28% chu HIVve+ an nih laiin, Mizoramah chuan 1.19% daih a ni," a ti a; ram rorelnaah duh thlanna dik loh vangin tihdam theih loh 'Aigupta khawihlí’ in Zoram a chênchilh thu a sawi.
Lalduhoma sawi danin, tunah Mizoram leibat zat chu cheng vbc. 7,887 a ni a, chu chu budget pumpui aṭanga 81.3% a ni. Kum 2018-19 chhunga Mizoram budget-a Mizoramin a thawh chhuah ve chu 8.3% chauh a ni a; Mizoramin a thawh chhuah ve chhun pawh zu chhiah, tui bill leh electrict bill aṭanga hmuh a ni ber.
A tak takah chuan Mizoram sorkarin thawh chhuah a nei lo tih sawiin Duhoma chuan, "Bat tam hi changkanna, leiba hnam kan ni. Delhi drip khaia nung kan ni tihte chu kan ram hruaitute ṭawngkam a ni ta. Hnam tam tak in pûktir ang a, nangni erawh chuan in pûk lo ang, mei ni loin lu-ah a siam ang che u a, a hnuaihnung ni loin a chungnung zel in ni ang, tih chu kan hlat hle a ni," a ti.
ZPM CM Candidate chuan, "Chief minister ṭhutthleng inthlakthleng ringawt te, minister inthlakthleng ringawtte hi change a ni lo. ZPM sorkar chu kalphung thar, mipui sorkar, Zoram politics-ah Pathian ram thlenna tur a ni dawn a ni," a ti bawk.
ZPM hruaitu Lalhmangaiha Sailo, MPC president pawhin thu sawiin, "Sorkar kan hrawn tawh leh hrawn mekte hi an hnathawh ṭhat an tih ve aia an lansarh zawkna chu, anmahni hamṭhatna leh an chhungte hamṭhatna chauh ûmtu an nihna hi a ni," a ti.
ZPM secretary general K Sapdanga chuan, ṭangrual pawlah pawl hrang hrangte chu tel zel tura an duh thu sawiin, "Pawl dangte rawn tel zel turin kan la sawm zel a, ṭangrual pawka rawn tel tur hian mahni pawl ṭhiah kher a ngai lo. He movement hi senior movement ni loin, senior-te ven ṭhalai movement a ni," a ti.
K Sapdanga chuan, inthlan lo awm tur chu sakhaw indona a ni bawk dawn tih sawiin, "Kristianna leh Hindu sakhua indona a ni dawn," a ti a; Mizoramah Hindi firifiak pawl RSS thurualpuitute an awm palh ang tih a hlauhawm tih sawiin, an awm loh nan ṭhahnemngai taka ṭawngṭai turin mipui a sáwm a ni.
Kumina Assembly inthlan awm tur chu 'Thatchhiat inzirtirtute leh hnathawh leh taimak inzirtirtute inbeihna' a ni dawn tih sawiin K Sapdanga chuan, "Keini chuan hna thawh kan inzirtir dawn. Kan sorkar huna phái chak ber tur chu Aizawl population hi a ni. Aizawla ni tin inhlawhna tur ngaihtuah rêng rênga buai ṭhinte hi an khaw lamah hna thawk tura haw an duh ang," a ti. Sawhthing an lei dan tur leh a hlâwk dan tur a sawifiah a, "Kum nga chhunga cheng nuai khat emaw, nuai nga emaw dawn nge kan duh, cheng nuai 25 thawh chhuah?" a ti.
ZPM Val Upa Council chairman Lalfakzuala chuan, Mizoram siamṭha turin sorkar thar a din ngei ngei a ngai tih a sawi a, "Pawisa cheng vaibelchhe tél an sem tawh a, NLUP dawngtute hian eizawnna ngêlnghet an neih phah lo tih a chiang,” a ti. ZPM Southern Hqrs. Lunglei chairman Lalrinzuala pawhin, "Sem policy hi Bible zirtirna kalh a ni. Ṭangrual pawl lo ding hi kohhran hoin Pathian kan au a, kan ṭawngṭai chhanna a ni," a ti bawk.
ZPM 'Zoram siamṭhatna khawmpui hi ZPM senior vice chairman Vanlalhlana'n a kaihruai a; chawhnuah mual inkhawm neih niin, Rev.Dr K Thanzauva leh Rev. Lalzuithanga ten thu an sawi a ni.