Kanhmun-Zawlnuam inkarah Bru-te'n kawngzawh an tum

Mizoram Bru Dis­placed Peoples' Coor­dination Committee (MBDPCC) chuan, Tripura relief camp-a electoral roll ennawn chungchanga YMA hmalakna an duh lohzia lantir nan kumin August 22 emaw, a aia hmain emaw Kanhmun leh Zawlnuam inkarah kawngzawh huaihawt an tum.

August 14, 2018-a MBDPCC thuchhuah chuan, August 10, 2018-a Mamit DC pisa aṭanga Tripura Bru camp-a kal tura official-te YMA Taitesena group leh MZP-te'n Zawlnuama an dang leh, chumi chungchangah chuan Mizoram sorkarin hma a la lo chu an dem thu a tarlang a; Election official-te chu draft electoral roll copy MBDPF hruaitute hnena pe tur an nih thu an sawi.

MBDPCC chuan, July 3, 2018-a sorkar laipui, Mizoram sorkar, Tripura sorkar leh Mizoram Bru Displaced Peoples' Forum (MBDPF) inremnaah, Mizoram Bru-te Mizorama lak let ṭan hmain Bru camp pasarihah electoral roll ennawn tura tih a nih thu an sawi a; chutiang a nih lai chuan, Mizoram sorkar chu 'game' khelah leh NGO-te an duh anga chêttirah an puh a ni.

MBDPCC hian Mizoram sorkar chu Bru tlanchhiate khawngaih tak tak lo-ah leh sorkar laopui nawrna vang chauha hma laah an puh bawk a, "Hengte avang hian Mizoram chhungah ngei, Kanhmun leh Zawlnuam inkarah August 22 emaw, a aia hmain emaw kawngzawh lian tham tak huaihawt kan tum ta a ni," an ti.

An hmalak dan tur chungchangah hian MBDPCC hruaitute chu August 13 khan Nai­singpara-ah an ṭhukhawm a, an president T Lal­dingliana'n a kaihruai a ni.