Police-ah ILP zir chiang tur ruat

Mizoram Director General of Police (DGP) Balaji Srivastava chuan, Inner Line Permit (ILP) guidelines-ah him tâwk lo a awm em tih zir chiangtu tur Mizoram police-ah an inruat thu a sawi.

Vanglaini palai zawhna chhangin DGP chuan, Assam sor­karin National Register of Citizens (NRC) draft list a tihchhuah hnuah Mizoramah hnam dang dan loa rawn lut an awm lohna atan theih­tawp an chhuah thu a sawi a, "ILP-ah a him tâwk lo lai a awm em tih IGP kaihhruaina hnuaia din a ni a, ni 21 chhunga report thehlut tura tih an ni. An thil hmuhchhuahte sor­karah kan thehlut ve leh ang," a ti.

Balaji Srivastava chuan, hnam dang dan loa Mizorama awm an awm leh awm loh dap chhuah rûnpui, ILP Special Drive an kalpui nia sawiin, "Dan loa Mizorama awm kan hmuh chhuahte chu kan thawnkir ṭhin," a ti a; hnam dang thawn kir chu thil buaithlak tak a nih thu a sawi.

DGP chuan, ramria police out post leh police station-te an thuam chak thu sawiin, "Zophai, Phaisen, Saipum, Vairengte leh Bairabi-ah police 10 dah belh vek a ni. Hei bakah hian ramria police-te patrolling neihtir ṭhin a ni a, patrolling-te hi police officer-te chu vil ṭhin tura tih an ni. District tin SP-te nen NRC hi kan sawiho tawh a, hnam dang dan loa an lo luh lohna atan ruahmanna kan siam," a ti.

Balaji Srivastava sawi danin, Assam sorkarin NRC draft list a tihchhuah hnuah ramri aṭanga Mizorama rawn luh tum man an la awm lo.