KHAWTHLIR

Power sawifiah
Power & Electricity department SE (Lunglei Power Circle) chuan thuchhuah siamin, Mizoram chhim lam hmun ṭhenkhata kawlphetha pek chhâwk a ngaih chhan a sawifiah. 132 Kv Sub Station, Khawivaah power transformer lian pahnih - 12.5MVA Kirloskar leh Areva te a awm a, Lunglei, Lawngtlai leh Siaha district-te a châwm tih tarlangin, "August 14, 2018 aṭangin power transformer lian pakhat zawkah harsatna tawh a ni a, hei vang hian transformer pakhat chauh hman theih a ni rih a, loh theih lohin inen chhâwk a ngaih phah a ni," a ti.

Mi 1,181 admit
July 2018 chhung khan Aizawl Civil Hospital-ah mi 34,523 an inentir a, mi 1,181 admit an ni. Nau piang 332 an awm laiin mi 50 an thi a; damlo 257-te chu state páwn lama inentir tur thawn an ni.

KVK-in ar pe
Krishi Vigyan Kendra (KVK), Kolasib chuan Mizorama hmeichhia kut hnathawktu hlang inzawmkhawm awm chhun, Kawnpui Women Farmers Club hnenah ár chi ṭha, rainbow rooster eng emaw zat an pe.

Pangpar dah
BJP, Mizoram Pradesh Prof. JV Hluna chuan India zalenna atana nasa taka hma latu Mahatma Gandhi leh Mizo pasalṭha Vanapa te a zahzia entir nan nimin khan Aizawla an limah pangpar a dah a; BJP hruaitu dangte'n an ṭawiawm.

Champhaiin duh lo
Champhai District NGO Coordination Committee chuan thuchhuah siamin, Mizoram sorkarin district headquarters hrang hrangah municipality din tuma hma a la chu lawmawm an tih thu an tarlang. Chutih rualin, municipal pangai taka din theih a nih laia adhoc chauha din tum a ni chu ṭha an tih loh thu an sawi a, "India danpuiin a sawi angin, adhoc municipal ni loin, municipal puitling ngei min pe turin sorkar kan phût a ni," an ti.

Heroin man
Excise & Narcotics department- Anti-Narcotics Squad te chuan nimin zing dar 2:35 khan Bawngkawnah heroin gram 252 (hawng 21) leh a neitua puh - Lalzuineihsial (29) s/o Sutaneihsial, Kolasib Tuiṭha Veng nia inchhál leh Ginminlun (42) s/o Letkhawlam Gangte, Tuiphai, Tamenglong district, Manipur nia inchhálte chu an man.