Internet hmanga complaint thehluh theihna Aizawla police station pali-ah bun a ni tawh

Inspector General of Police (Law and Order & Intelligence) LH Shanliana chuan nimin khan Aizawl SP conference hall-ah thuthar thehdarhtute a kâwm a; Aizawl khawpuia police station-ah internet kal­tlanga mipuiin complaint an thehluh theihna, Go-Live bun a nih tawh thu a sawi.

LH Shanliana chuan, Aizawl khawpuia police station pali - Aizawl PS, Bawngkawn PS, Vaivakawn PS leh Kulikawn PS-ahte Go-Live bun a ni tawh tih sawiin, "He thil hi police tan ringawt ni lo, mipui tan a ṭangkai dawn hle. Tu pawhin internet kaltlangin heng police station paliah hian complain an thehlut thei a, hei hian mipui tan awl­samna a thlen dawn a ni," a ti.

Crime and Criminal Trac­king Network and System (CCTNS) hmangin Mizorama police station 39 leh higher office 52 chu thlun zawm vek a nih tawh thu sawiin IGP chuan, "Police station 39-ahte pawh Go-Live bun vek tum a ni. Internet connectivity lamah harsatna kan tâwk a, hei hian hmalak a tiharsa rih a ni," a ti a; dedicated line hmangin police station-te chu internet pek tum mek a nih thu a sawi.

CID (Crime) SP Zosang­liana pawhin thu sawiin, Mizoram sorkarin CCTNS project pawimawhna hriain chak takin hma a la tih a sawi a, "CCTNS atan bik hian wide area network connectivity hi Mizoram pumah siam tura hmalak mek a ni. Hemi châwm tur hian NIC kaltlangin high speed internet lak a ni," a ti.

Zosangliana chuan, police station-te chu paper tel loa hna thawh theihna hmuna siam turin hmalak zel a nih thu sawiin, "Mizorama dan leh thupek kenkawh kawngah leh hnu chhuina kawngah CCTNS hi rahbi pawimawh tak a ni," a ti a; Go-Live chu mipuite'n ṭangkai taka an hman ngei a beisei thu a sawi.

Police hotute chuan, Go-Live avangin police-te'n hna an ngah phah dawn tih sawiin, indaih lohna vanga complaint lutte chinfel zung zung a nih loh pawhin hrethiam turin mipuite an ngen.

Go-Live kaltlanga com­plaint thehlut tur hian firefox emaw internet explorer browser hmangin www.cctns.mizoram.gov.in/citizen-ah luh tur a ni a, complaint thehlut bakah hian ngaihdan sawina te, FIR enna te, dan hrang hrang enna te, passport verification, etc. te a awm. FIR erawh chu Court lamin online hmanga tih an la pawm loh avangin thehluh theih a ni lo.