MZP-in ramri-ah checkgate siam an tum
Assam aṭanga dan loa Mizorama lut turte danna turin Mizoram sorkarin hma a lak âwm an hriat loh avangin MZP chuan hmalak an tum a; Assam aṭanga Mizorama lutte endikna checkgate siam an tum bakah, ramri hrula MZP headquarters, sub-headquarters leh branch-te chu a ṭul anga hnam dang lo lutte endik nghal turin an hriattir.
MZP general headquarters hruaitute chu nimin khan an pisaah an ṭhukhawm a; Assam-in National Register of Citizens (NRC) draft list a tihchhuah vanga dan loa Mizorama hnam dang lo lut tur veng tura Mizoram sorkar an ngaihchan hun, August 15 a liam tawh avang leh, Mizoram sorkar hmalakna a taka hmuh tur a awm loh avangin a ṭul anga hmalak ṭan an rel a ni.
MZP chuan, Mizoram ramri-ah hnam dang dan loa luh tum leh Assam NRC-a chuang lote enfiahna turin checkgate siam ni se, an ti a; "ILP pawh NRC-a chuang lo chu tun hnuah pe chhuak tawh lo turin thuneitute kan ngen nawn leh a; MZP headquarters, sub-headquarters leh branch-te, ramri hrul a awmte chu a ṭul anga hma la nghal a, hnam dangte lo check nghal tura hriattir an ni," an ti.
MZP chuan, Central pool-ah Mizoramin MBBS seat 18 leh BDS seat pasarih a nei leh chu lawmawm an tih thu an sawi a; chutih rualin, Mizoram Chakma Students Union (MCSU)-in Gauhati High Court-ah PIL an thehluh tihtawp tawh an tinung thar chu an duh loh thu sawiin, "High Court-in Mizoram (Selection of Candidates for Higher Technical Courses) Rules 2016 No. 5 suspend order a tih chhuah vanga MBBS leh BDS zirlaite counseling chhunzawm thei lo a, Mizo zirlai tam tak zir thei lo tur dinhmuna an ding mek hi kan hrethiam lo hle," an ti a; MCSU chu Mizo zirlaite tihbuai tum hrim hrimah an puh.
MZP hian High Court-a PIL hnâwl tawh hnu tihnun leh chu a rang thei ang bera hnûk kîr turin MCSU an hriattir tih an puang a, "Dan ding lai anga kal a nihna turin theihtawpin hma a la dawn a, a hmalakna kawnga hnam rilru pua Mizo mipui zawng zawng thlawpna kan ngen a ni," an ti a; Chakma-te engti kawng mahin Categary-I ah an awm an remti ngai dawn lo tih an tarlang.