Photo Exhibition Sales & Contest ṭan

Mizoram School of Photography leh Photography Club of Mizoram chuan nimin khan Vanapa Hall-ah '2nd World Photography Day Photo Exhibition Sales & Contest 2018' an buatsaih ṭan a, MJA president Zonunsanga Khiangte-in a hawng.

Zonunsanga Khiangte chuan, "Photography hi art ril tak tak inphûmna, thil tam tak pholangtu a ni a, thlalak pakhat pawh hian thil tam tak a sawi thei a ni," a ti a; thlalak awmzia tak tak Mizo mipui tam takin an la man tâwk loh avangin, exhibition buatsaihtute chu Mizo zirtir kawngah ṭan la zel turin a fuih.

Mizoram School of Photography (MSP) neitu Malsawmtluanga chuan, MSP chu March 2017-a din ṭan a nih thu leh tunah hian zirlai batch 4-na ten an zir mek thu a sawi a; December 5-8, 2018 chhung­in a duh apiang tel theihna turin thlalak intihsiakna, open photography contest buatsaih an tum thu a sawi bawk.

Photo Exhibition Sales & Contest 2018-ah hian thlalak 95 pho chhuah a ni a, August 18, 2018 thleng awh tur niin, a duh apiang­ tan tlawh theih a ni.