August 1-15 chhungin Vairengteah ILP 3,596 an pe chhuak - MNYF
MNF ṭhalaite chuan thuchhuah siamin, August 1-15, 2018 chhungin Vairengtea Police checkgate aṭangin mi 3,596 hnenah Inner Line Permit (ILP) pek chhuah a niin an tarlang a; tam an tih thu sawiin, chhui chiang turin sorkar an phût.
MNYF chuan, chief minister Lal Thanhawla'n August 8, 2018-a Kolasib-a thu a sawinaah, Assam aṭanga dân loa Mizorama hnam dang lut tur veng tur leh uluk lehzuala ILP endik turin thu an pek tawh thu a sawi tih an sawi a; "Thlamuang taka kan awm laiin, MZP sawi danin, August 1-15 chhungin Vairengte checkgate aṭang ringawtin mi 3,596 hnenah ILP pek chhuah a ni a, chawh rualin ni khatah ILP 239 zel pek chhuah ang a ni a, a rapthlak hle a ni," an ti.
Assam sorkarin National Register of Citizens (NRC) draft list an tihchhuah hnuah Vairengte mite'n an khuaah police dah belh an awm an hre lo nia sawiin MNYF chuan, "Ramri venhim hna pawh a pangngai renga kalpui a ni a, hmalak thar a awm an hre lo. Assam NRC-a chuang lote pawh ILP pek chhuah nia sawi a ni," an ti a; thil awm dan chu chhui chiang ngei turin sorkar an phût a ni.