Siaha DIET building thar hawng

Siaha-a District Institute of Education and Training (DIET) building chu nimin khan School Education minister H Rohluna'n a hawng.

Minister H Rohluna chuan, Mizoram DIET chiahin B.Ed zirna an la nei tih sawiin, "Hmarchhak state dangte'n an nei loh, pianphunga rualbanlote pawhin B.Ed Special Course zirna SCERT-ah a awm tawh. Heng hi zirna lama Mizoram hma ka sawnzia lanna pakhat a ni," a ti.

Zirnaa hmasawnna atan zirlai leh nu leh pa an pawimawh rualin, a pawi­mawh ber chu zirtirtute an nih thu sawiin H Rohluna chuan, "Zirtirtute tuaitharna leh tah hriamna tur hmunpui DIET building thar kan hawn hian trainee-te leh faculty member-te rilruah zirna a tihhmasawn phah ngei ka beisei," a ti a; faculty leh trainee-te duhsakna a hlan.

School Education secretary Esther Lalruatkimi pawhin thu sawiin, ram leh hnam himna, dinchhuahna leh hmasawnna chu zirnaah a awm tih hi hre reng turin Siaha DIET faculty-te leh trainee-te a chah.

Siaha DIET building thar hi cheng nuai 244.85 sênga sak, chhawng thum a ni a, building pumpui zau zawng chu sq.m. 846.54 a ni.