Minister hoin sorkar hmalakna sawiho

Food, Civil Supply & Consumer Affairs (FCSCA) leh Tourism department enkawltu minister John Ro­tluangliana chuan August 15, Nilaini tlai khan Lunglei Circuit House-ah a department chan hotute kâwmin, an hmalaknate a sawipui.

John Rotluangliana chuan, kum nga dáwn FCSCA a enkawl chhungin hmasawnna tam tak a thleng tih sawiin, "Harsatna leh mualphona em em awm loa department a kal theih chhan chu a thawktute'n thawhhona ṭha tak an neih vang a ni," a ti a; department-a thawkte thawhrimna leh inpekna avangin an chungah lawmthu a sawi.

Kumina fûrpui laia harsatna a awm loh nan Supply centre 47-ah October 2018 thleng tla tur buhfai chhêk khawl a nih thu sawiin Minister chuan, "Mipui ei leh barah harsa loa kan pek theih avangin a lawmawm hle a, LPG leh POL-ah pawh harsatna lian tham awm loin kalpui ṭhin a ni," a ti.

John Rotluangliana chuan, Tourism department-ah pawh nasa taka hmalak a nih thu sawiin, "Tourist facility awm sate thuam ṭhat mek a nih bakah, Zokhaw lamah rural tourism tihlârna atan NEDP hnuaiah Rural Homestay kalpui mek a ni a, Champhai district-a khaw paruk leh Mamit district-a khaw paliah he project hi kalpui mek a ni," a ti.

Transport minister ni bawk John Rotluangliana hian nimin khan Circuit House-ah Lunglei khaw­puia Transport department-a thawktute a kâwm bawk.