Governor leh Chief Minister-in PM hlui Atal Bihari Vajpayee an ui
Governor Kummanam Rajasekharan leh chief minister Lal Thanhawla te chuan thuchhuah siamin, August 16, Ningani tlai dar 5:05-a thi prime minister hlui Atal Bihari Vajpayee (93) chu an ui thu an tarlang.
Governor chuan, AB Vajpayee chu India rama hruaitu ropui berte zinga mi a nih thu sawiin, "Kan PM hlui Pu Atal Bihara Vajpayee, kan ram roreltu ropui tak, hla phuah thiam tak leh thu ril ngaihtuah mi huaisen kan chán ta hi pawi ka ti hle. External Affairs Minister a nih lai khan khawvel ram dangte nen inlaichìnna ṭha nei turin hma a la nasa a, PM a nih chhung khan a remhriatna vangin kan ramin hun khirh tak a paltlang a ni," a ti a; Vajpayee chhungte a tawrhpui thu a sawi.
CM Lal Thanhawla chuan, PM hlui AB Vajpayee a thi chu pawi a tih thu leh a ui thu tarlangin, "India ramin politician ropui tak a chán a ni.
Pu Vajpayee hi politics lamah mithiam a nih bakah, thu sawi thiam leh ziakmi ril tak a nihna hi ram mipuite tan rohlu a ni reng tawh ang. A chhungte'n he hun khirh tak an tawh lai hian Pathianin a thlamuan a, a awmpui turin ka ṭawngtai sak a ni," a ti.
Atal Bihari Vajpayee sûnna atan hian Chief Minister hian nimin kha Mizoram chhunga sorkar pisa zawng zawng, sikul leh college-te tan chawlhah a puang a ni. BJP, Mizoram Pradesh chuan nimin khan an pisaah AB Vajpayee sûnna hun an hmang a, Mizoram BJP president Prof. JV Hluna'n sûnna thuchah a sawi.
Prof. JV Hluna chuan, India ramin mi ropui tak a chàn thu sawiin, "AB Vajpayee hi mi nghet leh huaisen, BJP tan mai ni lo, India mipui tan pawha pa nih tling a ni. PM a nih lai pawhin kawng hrang hrangin India ramin hmasawnna kan nei a, mi huaisen tak a nih avangin India ram pawh ram dang hmuhah zahawm takin a siam a ni. India ramin mi ropui leh mi bik kan chán hi BJP Mizoram chuan kan ui hle a, kan sûn tak meuh a ni," a ti.
Atal Behari Vajpayee hi December 25, 1924-ah Gwalior, Uttar Pradesh-ah a piang a, natna hrang hrang vangin August 16 tlai dar 5:05 khan AIIMS, New Delhi-ah a thi a ni. AB Vajpayee hi kum 1996, 1998 leh 1999 khan India prime minister a ni.