KHAWTHLIR

Minister C Lalrinsanga chuan, a sum hmangin Covid-19 hripui donaa thawktute indaih lohna phuhrûk nan thawktu mi pasarih a ruai. Sorkar thuchhuah tarlan danin, Minister hian mi pasarih-te chu thla thum chhung atan a ruai a, Lunglei Chief Medical Officer hnenah lehkha thawnin, an mamawhna leh ṭul an tih apianga chhawr turin a hrilh a, nimin khan Lunglei CMO-ah joining report an pe a ni. Minister-in a rawihte hi hmeichhia paruk - medical lama thiamna nei vek leh mipa pakhat - driver turte an ni.

Lawngtlai DC thar Dr Andrew H Van­laldika chuan June 16, Thawhlehni khan bawrhsap mawhphurhna a la ṭan. Thawhlehni chawhnu khan Lawngtlai khawpuia quarantine centre hrang hrangte a tlawh nghal a, centre-a mawhphurtute nen thil pawimawh hrang hrang an sawiho. Lawng­tlai district-ah sorkar quarantine facility 13, community quarantine facility pali leh Covid Care Centre pakhat a awm a, mi 707 khung hran mek an ni.

IPR department chuan Mizoram Calendar 2021 an siam turah thlalak thehlut turin mipui an sáwm. Mizoram lanna thlalak mawi leh hlutna bik neite thehluh tur a ni a; RAW format-a thehluh tur niin, RAW-a thla la thei lo tan original jpeg image thehluh tur a ni. Thlalak khawih danglam (edit) pawm a ni lo a, July 31, 2020 ral hmain IPR Directorate-ah thehluh theih a ni.

Nimin tlai dar 4 thleng khan Chief Minister's Relief Fund-ah cheng nuai 942 a lut tawh. Nimin khan pawl mi eng emaw zatin CM Relief Fund-ah sum an thawh a; minister K Lalrinliana leh MLA L Thangmawia ten MLA fund aṭangin cheng nuai 25 ve ve an chhûng lut bawk. Nimin bika CM Relief Fund-a sum lut zat chu Rs. 50,91,000 a ni.

June 16, Thawhlehni thleng khan Covid-19 kaihhnawiha rilru lama harsatna neite'n an biak pawh tura tarlan, mental health expert mi 26-te chu mi 1,967-in an be tawh. Mi 1,967-te hi Mizoram chhunga mi 1,619 leh state páwna awm mi 348 an ni.