Aizawlah All India Writers Meet neih a ni

Sorkar laipuia Ministry of Culture hnuaia Sahitya Akademi leh Pachhunga University College-a Mizo department chuan chuan nimin aṭang khan PUC Seminar Hall-ah All India Writers' Meet an buatsaih a, Odia writer lâr Haraprasd Das-a'n a hawng.

All India Writers Meet hawnna inkhawm hi Sahitya Akademi secretary K Sreenivasarao chuan a kaihruai a; Haraprasad Das bakah, Mizoram aṭanga Sahitya Gereral Council member Darchuailova Renthlei, Mizoram University (MZU) Mizo department-a HoD Prof. Laltluangliana Khiangte leh PUC principal Dr Tawnenga ten thu an sawi.

All India Writers Meet hi Mizo­ramin a thlen vawi khatna a ni a, India ram hmun hrang hrang aṭangin writer lar tak tak 40 vel an tel a; Mizo writer-te bakah, Bengali, Kannada, Odia, Gujarati, Konkani, Malayalam, Hindi, Assamese, English, Manipuri, Nepali, Pubjabi leh Tamil writer-te an ni.

All India Writers Meet hi vawiin chawhma dar 10:30-ah chhunzawm leh a ni ang.

Meet chungchangah hian Sahitya Akademi secretary K Sree­ni­vasarao chuan nimin chaw­hma khan Aijal Club-ah thuthar thehdarhtute a kâwm a; Meet-ah hian hlachham chi chhiar chhuah, paper presentation, ziak mi naupang zawkte nena inkawmna leh thu leh hla sawihonate neih a nih dawn thu a sawi a; a duh apiang tan chhim theih a nih thu a sawi.

Zawhna chhangin K Sreeniva­sarao chuan, Mizo poetry leh folk­tale-te chu mi tu pawhin an letling thei a, Sahitya Akademi-in an tihchhuah (publish) an duh chuan Sahitya Akademi-ah an thehluh theih thu a sawi a, "Sahitya Akademi expert-te'n an endik ang a, chhuah tlaka an ngaih chuan Sahitya Akademi-in a chhuahsak thei a ni," a ti.