KHAWTHLIR

CM-in tawrhpui
Chief minister Lal Thanhawla chuan Kerela chief minister Pinarayi Vijayan leh Kerela opposition leader Ramesh Chennithala hnenah lehkha thawnin, tun hnaia ruahsûr nasa vanga Kerala leh a mipuite'n chhiatna leh harsatna nasa tak an tâwk chu pawi a tih thu hrilh. CM chuan, "Kerala-in hun khirh tak a hmachhawn mek hi Mizo mipuite'n an hriatpui a, nunphung pangngaia an let thuai theih nan kan ṭawngṭaisak reng a ni," a ti.

Tlan khap
Traffic SP chuan thupek chhuahin, Armed Veng Local Council ngenna angin, an venga Magazine Kâwn leh Market-cum-Community Hall inkar kawng zauh hna vawiin aṭanga thawh a nih dawn avangin, chawhma dar 10 aṭanga chawhnu dar 2 inkar chhungin lirthei tlân theih a ni dawn lo tih a puang.

DIET hawng
Lawngtlaia District Institute of Education and Training (DIET) building thar chu August 16, Ningani tlai khan School Education minister H Rohluna'n a hawng. DIET building hi cheng nuai 225 sênga sak a ni a, sq.metre 890.23 a zau niin, chhawng thum a ni. Building hawnnaah hian LADC chief executive member T Zakunga, School Education secretary Esther Lalruatkimi leh Lawngtlai DC N Chakhai te pawh an tel.

Siaha-ah training
Health department hnuaia Food & Drugs Administration chuan nimin khan Siaha DIC conference hall-ah Siaha khawpui chhunga V/C president leh secretary-te leh Mara Chano Py (MChP) gen.hqrs. hruaitute pualin 'Training for trainers cum drugs awareness campaigan' an buatsaih a; ei leh in thianghlim chungchang leh damdawi hman sual chungchang an zirtir.