Ruihhlo vangin Mizoramin a tuar nasa - Law & Judicial Minister

Mizoram Law College leh Mizoram State Legal Services Authority (MSLSA) ṭang­kawp chuan nimin khan Mizoram Law College-ah 'Seminar on Legal Services to Victims of Drug Abuse and Eradication of Drug Menace' an buatsaih. Seminar hawngtu, Law & Judicial minister Lalsawta chuan, ruihhlo vangin Mizoramin a tawrh nasat thu a sawi.

Law & Judicial Minister chuan, ruihhlo vanga harsatna Mizoramah chhungkaw tam takin an tawrh thu sawiin, "Ṭhalai tam tak a hun loah ruihhlo vangin an thi a, ruihhlo vanga retheihna leh harsatna Mizoramin a tâwk nasa hle. Ruihhlo vanga kawng tinrenga kan chànna hi chhiarkawp hmanga chhût theih a ni lo a, a nasa a ni," a ti.

Ruihhlo do kawnga YMA hmalakna fakin, "Anni aia ruihhlo do kawnga thawk nasa an awm lo. YMA-te pawh a cháng chuan ruihhlo do kawngah an beidawng teuh ṭhin hle a, ruihhlo tawlhtute hrem kawngah an chan a chhiat ṭhin vanga an beidawnnate pawh a awm," a ti a; Court-in hrem phute a hrem theih nan seminar-in ruahmanna ṭha zawk a chhawp chhuah ngei a beisei thu a sawi.

Gauhati High Court judge Michael Zothankuma pawhin thu sawiin, ruihhlo vangin khawvel ram zawng zawng deuh thawin harsatna an tawh thu a sawi a, "Ruihlo do hna hi ṭangruala thawh chi a ni. Pawl pakhat chauhin a do a, mi dangin an thlir mai mai chuan hneh chi a ni lo a, sorkar, mipui, pawl hrang hrang, NGO-te leh mimal anga ṭanrual vekna tur thil a ni," a ti.

Justice Michael Zothankhuma chuan, ruihhlo chungchanga hrem tâwkte hremna case thlir letin, ruihlo tam tham mansak vang a ni lo vek tih sawiin, "A awmzia chu, ruihlo tawlhtu tak tak, sumdawnna lian tham tak atana hmangte chu man leh hrem an la ni lo. Ruihlo do kawngah dan chu mahni kuta dah loin thuneitute kuta hlan chhawn a ṭha," a ti a; enforcement agency aṭanga a chian loh chuan Court-ah hrem phu hliah hliahte pawh hrem theih loha an awm palh theih thu a sawi.

Seminar hawnna inkhawm hi MSLSA member secretary Vanlalenmawia'n a kaihruai a; Mizoram bakah, Haryana, Punjab, Manipur, Nagaland, Assam, Maharashtra aṭangtein an tel a, thupui hrang hrang an zirho a ni.