MZP-in hnam dangte an enfiah ILP nei lo leh NRC-a tel lo an hmu

MZP chuan nimin khan Aizawl leh Mizorama khaw dang ṭhenkhatahte hnam dang dan loa awm, Inner Line Permit (ILP) nei lo leh Assam National Register of Citizens (NRC)-a chuang lo leh permit nei loa sumdawngte dap hnatlang an huaihawt. ILP nei lo leh Assam NRC-a chuang lo, dan loa Mizo hming hawha sumdawng eng emaw zat hmuh chhuah an nih thu leh police hnenah an hlan nghal thu an tarlang.

Hnam dang enfiah hnatlangah hian MZP hruaitute bakah college hrang hranga students union hruaitute leh hnam pual zirlai pawl hruaitute an thawk chhuah a ni.

Sorkar leh thuneitute'n theihtawp chhuah a hma an lak mek laia ni khat hnatlannaa hnam dang permit nei lo leh Assam NRC-a chuang lo leh dan loa sumdawng eng emaw zat man tur an awm chu pawi an tih thu tarlangin MZP chuan, "Hnam dang dan loa khawsate hi permit nei lo bakah, anmahni leh anmahni lo in sponsor te, hnam dang vêkin an sponsor-te an ni," an ti.

MZP chuan, ILP chu a nihna ang taka hmang tur leh a pek chhuah danah fimkhur leh zuala turin sorkar thuneitute an ngen a, "ILP hi Assam NRC-a chuang lo chu tun hnuah pe chhuak tawh lo turin thuneitute kan ngen nawn leh a ni," an ti a; Mizorama khua/veng tina VC leh LC-te chu hnam dang ILP issue chungchangah document felfai lo chu hriatpuina lehkha pe chhuak tawh lo turin an ngen bawk.

Mizorama hnam dang dan loa khawsa a hmuh chhuahte chinchang ngun takin an en zui dawn tih sawiin MZP chuan, "Thawn kîr (push back) an nih dan pawh Vairengte thlengin kan ûm zui dawn a ni," an ti.