Hriselna lamah Mizote'n hma kan sawn - Health Minister

Haulawng damdawi-in, Primary Health Centre (PHC) building sak thar chu August 16, Ningani khan Health minister Lal Thanzara'n a hawng. Minister chuan, hriselna kawngah Mizote'n hma an sawn thu a sawi.

Lal Thanzara chuan, hri­selna leh zirna chu ram ṭhang mekte tan hmasawnna tehfung pawimawh ber a nih thu sawiin, "Hriselna kawngah Mizote nasa takin hmasawnna tur kan nei a, dam duh chuan kan nunphung kan uluk a ṭul. Mahni hriselna ṭheuh ngai pawimawh a, ruih theih thil laka fihlim piah lamah, vaihlo zûk leh hmuama filhlim te, mahni tlin tâwka ei leh in uluk leh nunphung ṭha neih a ṭul," a ti.

Health Minister chuan, specialist doctor panga leh medical doctor 31 lak thuai a nih tur thu sawiin, "Nurse 70 dah ngheh an ni dawn. District hospital leh health centre-te hmanraw changkang zawka ṭhuam that leh tihchangtlun a ni. MBBS zirna MIMER kan hawng tate hi Mizoram tan hlawh­tlinna ropui tak a ni," a ti a; national health programme hrang hrangte ngawrh taka kalpui zel a nih thu a sawi.

Bialtu MLA PC Lalthanliana, minister pawhin thu sawiin, "Sorkar hmalaknain Mizoram hmun hrang hrangah nursing school hawn a ni a, tun dinhmunah Mizo nula leh tlangval tam takin khawvel hmun hrang hrangah nursing hna thawkin an hlawhtlin pui hle a ni," a ti a; sorkarin mipuite hmakhaw ngaia hmasawnna ruhrel a siamte chu duat tak leh neitu rilru pua enkawl turin kalkhawmte a ngen.

Haulawng PHC building hi cheng nuai 90.69 sêngin March 21, 2016-ah sak ṭan niin, February 17, 2017-ah sak zawh a ni a; nurse station, labour cum delivery room, minor operation theatre, sterilization, laboratory, medical officer room, ayush officer room, pharmacy, nurse changing room, casualtu leh store room-te a awm a ni.