Satellite Boar Semen Station hawng

Hnahthiala AH&Vety Complex-a vawk kah raina, Satellite Boar Semen Station chu August 16, Ningani khan AH&Vety minister C Ngunlianchunga'n a hawng. Hawnna inkhawmah hian bialtu MLA John Siamkunga pawh a tel.

C Ngunlianchunga chuan, AH&Vety department-in hmun hrang hrangah ram ṭha tak tak an nei tih sawiin, "Heng kan department ramte hi mimal ṭhenkhatin lo hmu táiin min chhuhsak duh an awm ṭhin a, a pawi hle," a ti.

Hnahthialah vawk hrisel ṭha an neih theihna atan Satellite Boar Semen Station din a ni tih sawiin C Ngunlianchunga chuan, "He lai hmunah hian natna inkai darh a hlauhawm avangin tlawhpawh phal a ni dawn lo," a ti a; Hnahthial mipuite chu Satellite Boar Semen Station tlawhpawh lo tur leh a awmna ram chu hmu tai lo turin a chah.

AH&Vety Minister chuan, chief minister Lal Thanhawla kaihhruai sorkarin mipui ṭhatna tur a ngai pawimawh tih a sawi a, "A theih dan dana chawikan tumin hma a la a, mi harsa leh ṭanpui ngaite ṭanpui nan NLUP a sem a, tuna a ti tak takte dâwm kanna tur NEDP a kalpui leh mek. Hnahthial leh a chhehvelte hi vawka kan intodelh hi a ṭul hle dawn a ni," a ti bawk.