PUC-in an diamond jubilee an lawm

Pachhunga University College (PUC) chuan nimin khan an college Multipurpose Auditorium-ah PUC kum 60-na champha, diamond jubilee an lawm a, Mizoram University vice chancellor Prof. KRS Sambasiva Rao khuallian a ni.

Prof. KRS Sambasiva Rao chuan, PCU hmasawnna chu ropui a tih thu sawiin, "He college hi India ramah pawh a nêp lo a, hmarchhak bialah phei chuan a ṭha ber pawl a ni a, a chhuanawm hle. He college hmasawnna tur hian thawhpui ka inhuam reng a ni," a ti.

PUC principal Dr Tawnenga chuan, kum 60 chhung Pathian hruaina hnuaia hlawhtling taka an kal thei chu lawmawm a tih thu leh, college hmasawnna tura thâ lo thawh tawh zawng zawngte chungah an lawm thu a sawi.

Jubilee lawmnaah hian PUC-a lo thawk tawh - principal, zirtirtu leh non-teaching staff la dam te, PUC dinna tura sum leh tha thawhtu Pachhunga te chhungkua leh HK Bawichhuaka te chhungkua te, College Governing Board hmasa bera member la dam awm chhun J Malsawma leh college zirlai batch hmasa ber la damte hnenah lawmpuina thilpek hlan a ni. Zirlaite’n làm leh zai chi hrang hrang an entir bawk.

Diamond jubilee pualin PUC zirlaite leh thawktute'n pawisa an thawhkhawm a, chungte chu Aizawla children’s home panga hnenah an pe a ni.

PUC hi August 15, 1958-ah Aijal College tih hming púa din a ni a, Mizorama college hmasa ber a ni. A dinna tura sum thawhtu Pachhunga a thi hnuin a hming chawiin Pachhunga Memorial College tih a ni a, kum 1965-ah Assam sorkar hnuaiah dah a ni. Kum 1979-ah NEHU hnuaia constituent college a ni a, chuta ṭang chuan Pachhunga University College tih a ni ta a ni.

Tun dinhmunah PUC-ah hian bachelor degree zirna department 23 a awm a, academic session 2018-19 aṭangin Bachelor of Business Management zirna leh sunject pathumah master degree zirna hawn thar a ni. PUC hi UGC hnuaiah community college leh college with potential excellence a ni mek a, ISO certified a nih bakah, NAAC accreditation A+ a ni mek bawk.