Mizoramin Central pool-ah MBBS seat 18 hmu ; MBBS leh BDS zirtur thlan theih a la ni lo

Mizoram chuan kuminah Central pool hnuaiah Bachelor of Medicine, Bachelor of Surgery (MBBS) seat 18 leh Bachelor of Dental Surgery (BDS) seat pasarih a nei. Heti hian, Mizoramin kumina MBBS seat a neih zawng zawng chu 102 a ni. Hetih lai hian, Gauhati High Court thupek vangin Central pool-a MBBS leh BDS zir turte thlan theih a ni rih lo.

Sorkar laipuia Ministry of Health & Family Welfare-in kumina Mizoram tana MBBS leh BDS seat a peknate chu tun hnai khan a tichhuak a ni. Mahse, August 8, 2018 khan Gauhati High Court-in The Mizoram (Selection of Candidates for Higher Technical Courses) Rules, 2016 a 'stay' a, hei vang hian Central pool-a MBBS leh BDS zir turte hi thlan theih a ni rih lo nia thu dawn a ni.

Higher & Technical Education (HTE) department-a Technical Wing hotute sawi danin, Mizoramin North Eastern Council (NEC) hnuaiah kumin hian MBBS seat - Regional Institute of Medical Sciences (RIMS), Imphal-ah pasarih, North Eastern Indira Gandhi Regional Institute of Health and Medical Sciences (NEIGRIHMS), Shillong-ah pathum, Assam Medical College-ah pahnih leh Tripura Medical College-ah pahnih a nei a; a vaiin seat 14 a ni. Mizoram Institute of Medical Education and Research (MIMER)-ah seat 70 a nei bawk.

Heti hian Central pool, NEC leh MIMER-a Mizoramin MBBS seat a neih zawng zawng chu 102 a ni.

Mizoram sorkarin MIMER din tawh mah se, kumina Mizoramin Central pool leh NEC-a seat a neih zat hi kum hmasa 2017 (2017-18) aiin pathumin a tam zawk a; kum 2017-ah chuan seat 29 neiin, Central pool-ah seat 17 leh NEC-ah seat 12 a ni. Central pool-a BDS seat hmuh zat erawh kum 2017 leh 2018-ah a inang thung.

August 8, 2018-a Gauhati High Court thuchhuak vangin Mizoram quota-a MBBS leh BDS zirturte'n admission an tithei rih lo a, Central pool aṭanga seat chang turte pawh allotment pek theih a ni rih lo.

Hetih lai hian, Central pool aṭanga MBBS leh BDS zir turte hian August 25, 2018 hmaa admission an tih vek a ngaih tawh avangin, tunah hian Higher and Technical Education department hotute leh Mizoram sorkar ukil ṭhenkhat chu Guwahati-ah kalin High Court thutlukna chu ṭhiah a nih theih dan tur leh zirlaite hian a hun taka admission an tih theih dan tur an buaipui mek a ni.