Hripui thilah CM hoin inràwnkhawm ; Lockdown puan ṭul ti lo an tam ; Zan curfew puanin sawi a hlawh
Nimin khan Assembly Annexe conference hall-ah chief minister Zoramthanga hoin Covid-19 léng mek leh Omicron a lo luh palha hmalak dan tur sawiho a ni a; tlawmngai pawl, political party, kohhran hruaitu leh pawl hrang hrang aiawhte an tel. Lockdown puan ṭul ti lo an tam a, zan curfew chungchangin sawi a hlawh.
CM Zoramthanga chuan, hripui laka tih theih chinah invên a pawimawh thu sawiin, "Pathianin ṭul a tih chuan USA pawhin a ngaihna an hre lo. Medical leh IPR lamin theihtawpin invenna lam inzirtir zel a pawimawh. A hmain thingtlang lamin Aizawlin hri an kai an hlau a, tunah chuan Aizawl lamin thingtlangin hri an kai an hlau lêt tawh thung," a ti.
Hripui do turin tih tak zeta ṭan a ngaih thu sawiin Zoramthanga chuan, "Sorkarin theihtawp a chhuah laia hripui vei an awm reng avangin a ni lo záwnga indem pawh a awm thei. Kan ṭhenawm state-te hian kan in test ang chiah hian in test ve se kawng tinréngah a number-ah an sang ngawt ang," a ti a; Mizoramah chuan sorkar, tlawmngai pawl, kohhran leh khawtlang an ṭan rual thu a sawi.
Chief Minister chuan, Omicron chu engtik hunah emaw chuan Mizoramah a lut ngei ang tih ngaihtuah chunga inbuatsaih a ngaih thu sawiin, "Theihtawpin ṭan kan la ang, a ṭul chuan sorkar laipui pawh an inhawng khawp mai," a ti.
Ṭhutkhawmah hian Health minister Dr R Lalthangliana'n Covid-19 lénga Mizoram dinhmun tlangpui, sorkar hmalaknate leh Omicron thleng thei laka sorkar inbuatsaihnate a tarlang.
DMR minister Lalchamliana chuan inkaihhruaina (SOP) a sawifiah a, "SOP duan hi sorkar laipui chuan DMR kutah a dah a, mahse, hriselna lam thilte a nih avangin Health Minister hoin doctor, kohhran hruaitu, NGO leh sàwm ṭul nia hriatte nen inràwnkhawmna buatsaih a ni ṭhin. Inràwnkhawmna êngah Chief Secretary kaihhruai SEC-in SOP siamin CM-in a pawmpui ṭhin," a ti.
Lalchamliana chuan, SOP-ah sawisel deuhte a awm ṭhin thu sawiin, SOP-ah rawtna nei duh tan chuan Chief Secretary emaw, ama hnenah emaw thlen theih reng a nih thu a sawi.
Pawl hrang hrang aiawhte chuan lockdown-in mipui economy a tihchhiat nasat avangin loh theih loh thil a awm a nih loh chuan lockdown puan tawh loh an duh thu an sawi hlawm.
Chhûn lama nunphung pangngaia awm theih a nih laia zan lama curfew puan a ni chuan sawi a hlawh a, curfew puan a nih chhan sawifiah turin thuneitute ngen an ni. Chhun lama inkhawm theih a nih laia zan lam inkhawm khap a ni pawh a chhan zâwt an awm bawk.
Zan curfew chungchang sorkar thuneitute zinga sawitu awm chhun MLA Dr ZR Thiamsanga, Covid-19 Medical Operational Team chairman chuan, "Zanah hri hi a tam hluai lo. Zanah chuan kan zalên a, kan fimkhur lo ṭhin. Chhuah tam loh, puipunna siam tam loh leh mask vuah ṭhat hi kan invenna atana ṭha ber a ni," a ti.
Ṭhutkhawma sawi dang ṭhenkhat
• Sorkarin district tinah RT-PCR dah thei se
• District khawpuia damdawi-in tinah ICU awm thei se
• State páwn aṭanga rawn lutte RAT ni lo, RT-PCR hmanga endik vek ni se
• Task force-te thuam chak leh deuh ni se
• Hripui dona atan sorkarin a sum ren lo se