KṬP General Conference sawn hla tur leh palai zat titlem turin CKṬP an ngen

March 3-6, 2022 chhunga Kolasib-a KṬP General Conference neih tur chu inkhawmpui palai titlém tur leh a hun pawh Covid-19 léng dinhmun thlir chunga sawn rih turin Kolasib-a sorkar official-te'n Central KṬP hruaitute an ngen. Inkhawmpui kaltlangpui a nih pawhin, palaite swab sample endik hmasak vek tura tih a ni bawk.

KṬP General Conference chungchang hi nimin khan Kolasib bawrhsap Dr H Lalthlangliana hoin DC conference hall-ah sawiho a ni a; Kolasib-a sorkar official te, Central KṬP leh KṬP General Conference Organising Committee hruaitute an tel a, CKṬP hruaitute chu leader Rev. Vanlalmuanpuia Khiangte hoin an tel.

Kolasib aṭanga thu dawn danin, DC chuan CKṬP hruaitute chu Covid-19 léng mek dinhmun thlir chunga inkhawmpui hun sawn hlat dan ngaihtuah tur te, palai kal tur zat titlem tur leh palaite chu mimal ina inthlentir lo a, hall emawa thlentir dan ngaihtuah turin a ngen.

Bawrhsap chuan, KṬP General Conference chu neih a nih pawhin, palai kal zawng zawngte swab sample endik hmasak vek a nih tur thu leh, conference hmaa negative certificate neite pawh endik vek tur an nih thu a sawi a; inkhawmnaah pandal-a leng zat (seat capacity) aṭanga a zatve (50%) aia tam inkhawm a rem loh tur thu leh zaipawl zai pawh a remchan loh tur thu a sawi bawk.

Central KṬP hruaitute chuan, Kolasib DC kaihhruaia sawihote chu KṬP Central Committee-ah an lo sawiho ve leh tur thu an sawi.

CKṬP chuan KṬP General Conference programme duang fel tawhin, chanvo nei turte pawh an ruat vek tawh a; palai kal tur zat pawh titlemin, branch member zat azirin kal tur zat bitliah a ni a, bithliah zat anga an kal a nih chuan palai 10,000 vel tel thei tura ngaih a ni.

Hetih lai hian, sorkar thuchhuah tarlan danin, Kolasib district bika Covid-19 dinhmun thlir niin, hripui vei enkawl lai mi 96 an awm mek thu leh ni 10 liam ta chhunga positivity rate chu 1.98% chauh a nih thu sawi a ni a; ram pumah Covid-19 positive hmuh belh zel a nih avangin fimkhur lehzual a ṭul thu sawi a ni.

KṬP General Conference atana inbuatsaih dante ngaihthlak niin, palai beisei zat te, thlenna tur leh ei leh in buatsaih dan turte zir chian a ṭul thu sawi a ni a; inkhawmpui palaite chu Covid-19 an kai leh kai loh endik vek tur a nih thu leh, ram puma hripui vei awm dan azirin a hun sawn a ngaih theih thu sawi a ni bawk.

DC Dr H Lalthlangliana chuan, KṬP General Conference chu ruahman sa anga hlawhtling taka kalpui ni se a duh thu a sawi rualin, hripui laka mipui himna ngaihtuah a pawimawh tel thu a sawi a; CKṬP hruaitute chu sorkar inkaihhruaina leh mipui himna ngai pawimawh chunga inbuatsaih turin a chah a ni.