Cheng nuai 10 sénga kawng thar laih Hmunṭha khawtlangin pawi an ti

Mizoram sorkar chuan Ṭâwi pûk panna turin kawng awm sa chei ṭha loin cheng nuai 10 séngin kawng thar a lai. Hemi chungchangah hian Hmunṭha khuaa VC, tlawmngai pawlte leh political party-te chuan nimin khan thuchhuah inṭawm siamin, an hriatpuina leh remtihna la hmasa loa an khaw rama hmalakna a awm chu pawi an tih thu leh sorkar sum indaih loh lai a nih avangin sum a lo thlàwna sènnaa an ngaih thu an tarlang.

Hmunṭha joint meeting tarlan danin, an khua aṭangin Ṭawi pûk panna kawng awm sa a awm a, kawng awm sa chu chei ṭhat theih ni mah se, Art & Culture department kaltlangin Maite MNF Unit-in Hmunṭha khaw ram chhungah cheng nuai 10 séngin Ṭawi pûk panna tur kawng thar an lài a ni.

Ṭawi pûk panna kawng laih thar chu tun hnaiah tu tih hriat lohte'n an tichhia tih tarlangin joint meeting chuan, "A pawi kan ti a, a tichhetute hi man chhuaha an phu tâwk hremna pek ngei ni se ṭha kan ti. He thil thleng chungchangah rin thua news leh media ṭhenkhata khaw hminghmerha hmingchhiat theihna tur zawnga thuchhuah a awm hi pawi kan ti a, kawng siam tihchhiat chungchangah hian Hmunṭha khaw mi leh sa inhnamhnawih an awm awm kan hre lo," an ti a, tun hnuah thleng tawh lo se an duh thu a tarlang.

Hmunṭha khawtlang hruaitute hnen aṭanga thu dawn danin, November 21, 2021 khan Maite MNF Unit chuan kawng an lai ṭan a; November 24, 2021 khan Hmunṭha VC President chu phone hmanga biak niin, kawng laih chungchang hrilh a ni. Sorkar aṭangin an khaw ram chhung leh sanctuary chhungah kawng laih a ni dawn tih hriattirna an dawng lo.

Hmunṭha khaw chhung aṭanga Ṭawi pûk panna kawng chu kawng chhia ni lo mah se, chei ṭhat thei reng a nih laia cheng nuai 10 sénga kawng dang laih chu sum siamna maia an ngaih thu an sawi bawk.

Hmunṭha joint meeting resolution ṭhenkhat
1. Ṭawi pûk hi Ṭawi tlanga awm, Hmunṭha aṭanga km. 2 vela hla a ni a, a panna kawng hi Hmunṭha aṭanga awm sa a ni.
2. Hmunṭha aṭanga a panna awm sa ni lo, Hmunṭha ram chhung aṭanga Ṭawi pûk panna kawng dang siam kan remti lo.
3. Hmunṭha ram chhunga pi leh pute sûlhnu leh hmun hlu dangte VC leh NGO-te remtihna leh phalna la hmasa lo chuan sorkar, mimal leh pawl anga sum siam nan leh a chhan eng vang pawh ni se, kutthlak/khawih phal a ni lo.