January 11-a Covid-19 vei hmuh zinga 71.36%-in symptom an nei

January 11, Thawhlehni khan Mizoramah Covid-19 vei mi 880 hmuh chhuah a ni a, an zinga 71.36% chu natna lang chhuak (symptom nei) an ni. Nimin khan hripui vei dam tawh mi 296 chhuahtir an ni a, hripui vanga thi an awm lo.

Covid-19 vei Thawhlehnia hmuh chhuahte chu mipa 443 leh hmeichhia 437 an ni a; ZMC laboratory-a hmuh 63, TrueNAT hmanga hmuh 21, RAT hmanga hmuh 772 leh FIA hmanga hmuh 24 niin, positivity rate chu 20.36% a ni.

IPR tarlan danin, hripui vei mi 20 aia tam hmuhna khuate chu - Mualphengah 111, Rabungah 110, Phullenah 39, Pilêrah 28, Leithûmah 20 niin, symptom nei vek an ni a; Rullàma 25 leh Hualtu-a 21-te pawh a tam zawkin symptom an nei. Thenzawlah mi 35 hmuh ni mah se, a tam berin symptom an nei lo. Khawzawl district-a sample endik 116-te an positive vek bawk.

Sample endikna district 11 zingah positivity percentage 10% aia a sànna district pakua a awm a, a sànna ber Khawzawl district-ah 100% a ni a, a hma nía endikah pawh 100% a ni. Positivity rate 10% chung lam district dangte chu Saitual 37.53%, Lunglei 36.79%, Siaha 22.09%, Champhai 21.46%, Serchhip 18.67%, Aizawl 17.97%, Mamit 15.41% leh Lawngtlai 11.39% a ni.

Nimin tlai dar 5 thleng khan hripui vei dam tawh mi 296 chhuahtir an ni a; district tina chhuak zat chu - Aizawlah 90, Serchhipah 67, Khawzawlah 56, Mamitah 33, Lungleiah 32, Kolasib-ah pakua, Champhaiah paruk leh Saitualah pathum a ni.

IDSP record angin, Mizoramah Covid-19 vei 1,48,438 hmuh chhuah a ni tawh a, mipa 71,261 leh hmeichhia 77,177 an ni. Nimin tlai dar 5 thleng khan mi 1,41,531 (95.35%) chhuahtir an ni tawh a, mi 564 (0.38%) thi tawhin, enkawl mek mi 6,343 (4.27%) an awm.

Kum 2011 chhiarpui aṭanga chhûtin, Mizorama Covid-19 vei hmuh tawh 1,48,438 chu mi 1,000 zelah hripui vei mi 135 an awm ang a ni a; mi 1,00,000 zela Covid-19 vangin mi 51 an thi tawh ang a ni tih sorkar thuchhuakin a tarlang.

Mizorama swab sample endik tawh zawng zawngah RT-PCR hmanga endik zat percentage ni tin a tlahniam hret hret zel a, RAT hmanga endik zat a pung zel thung. January 11, 2021 thlenga swab sample endik tawh 15,53,634 aṭanga RT-PCR hmanga endik zat percentage chu 21.42 a ni a, RAT hmanga endik zat chu 72.78% a tling.