Thuneitu sang zawk thu lo chuan Assam-in hmunphiah lâk phal lo

Vairengte Aitlang hmuna ram neitute chuan nimin khan Aitlanga inkulh Assam police hotute telephone hmangin an bia a, an hmunphiahte lak phalsak turin an ngen. Assam police-te chuan, thuneitu sang zawk aṭanga thu an hmuh loh chuan an phal loh thu an lo hrilh.

Vanglaini thu dawn danin, Aitlanga ram neitute hian Assam police-te hmuh tum mah se, phalna an neih loh avangin an hmu thei lo a; an hotupa chu telephone hmanga biain, an hmunphiahte lak phalsak turin an ngen a ni.

Aitlanga awm mek Assam police hotu chuan, thuneitu sang zawk aṭanga thu an hmu a nih loh chuan hmunphiah neitute ngenna chu a tihhlawhtlinsak theih loh tur thuin a lo chháng.

Ram neitute hian nimin vek khan Assam police hotuin a lo chhan dan chu Vairengte SDO (Civil) hnenah an thlen nghal a; SDO pawhin Kolasib DC a hrilh chhawng ve leh nghal a ni.