KHAWTHLIR

JERC member-ah R Thanga ruat
Joint Electricity Regulatory Commission (JERC) for Manipur and Mizoram member atan Rengthanvela Thanga (R Thanga) chu ruat a ni a, kum nga chhung atan niin, Manipur side-a awm tura tih a ni. JERC member atana R Thanga ruatna thupek hi January 11, Thawhlehni khan sorkar laipuia Ministry of Power chuan a tichhuak a, pay scale chu Rs. 67,000-79,000 a ni.

Thisen pe
KṬP, Saikhamakawn Branch chuan an branch din champha pualin nimin khan thisen pek an huaihawt a, Synod Hospital tan thisen unit 24 an pe a, petute mipa 19 leh hmeichhia panga an ni.

Lehkhabu tlangzarh
Nimin, January 12, 2022 khan 'Phuaibuang Khúa leh a Chhehvel' tih lehkhabu Lungmuana ziah chu Sinlung Hills Council dy. chairman Vanlalsiamsanga chuan Zonet Studio-ah a tlangzarh. He lehkhabu hi phek 508-a chhah niin Rs 450 man a ni ang.

Kawmawl hlàn
Every Infant Matters, New Delhi chuan Lawngtlai district-a chhungkaw khawsak harsate ṭanpui nan kawmawl (blanket) 250 an pe a, nimin khan Lawngtlai DC Dr Andrew H Vanlaldika'n kohhran hrang hrang 10 hruaitute, Lairam Motherless Home hotute leh hmun dang panga hnenah a hlan. Kohhrante hian an huam chhunga a dawng tura thlan chhuahte hnenah an pe dawn a ni.

Hripui hluarna khuate tlawh
Assembly deputy speaker Lalrinawma chuan nimin khan a bial, Tuikum huam chhunga Covid-19 hluarna khua - Rúllàm, Lungpho, Ngèntiang leh Thinglian khuate a tlawh a, khawtlang hruaitu leh village task force-te nen an inkâwm bakah, community covid care centre-te a tlawh. Lalrinawma chuan, mimal himnain vantlang himna a thlen tih sawiin, "Vantlang himna tur chuan mi tin kan fimkhur leh vaccine kan lak ṭhat a pawimawh," a ti.