Pawl parukin Champhai DC sawn an duh

13th January, 2022

Champhai district-a lirthei neitu leh khalhtu pawlte leh trade union pawl parukte'n Champhai DC Maria CT Zuali sawn chhuak tura chief minister Zoramthanga an ngenna lehkha tihdarh a ni. Lehkha hi CM hnenah an la pe lo nia thu dawn a ni thung.

Bawrhsap Maria CT Zuali sawn chhuak tura Chief Minister ngenna lehkha tihdarha pawl hming tarlante chu - Champhai District Truck Owners Association, Mizoram Truck Drivers Association Champhai Sub-Hqrs, Champhai 407 Truck Owners Association, Champhai 207 Owners Association, Champhai District Tipper Owners Association leh Champhai District Border Trade Transport Union-te an ni.

Pawl parukte chuan an lehkhaah, Champhai chu India leh Myanmar ramria awm an nih thu leh chhungkaw tam takin sumdawnna innghahna atan an hman nasat thu an tarlang a, "Tunah hian he kan innghahna border trade sumdawnna hi danchahin a awm mek a, keini border trade behchhana motor-a eizawngte phei chu a tuar ber kan ni ngei ang. Heng harsatna kan tawhna chhana a bul tumtu ber Champhai DC Pi Maria CT Zuali hi a rang thei ang bera min sawn chhuahsak turin kan ngen a che," tiin an ziak.

Hetih lai hian, Champhai District Truck Owners Association bik chuan January 11, Thawhlehni khan thuchhuah siamin, kuhva ro phurtute an nih thu an tarlang tawh a, "A karah phal loh thil (contraband) a tel kan hre ngai lo. Bag chhia leh him lo pawh vawi duai lo kan hmuh ve tawh avangin ruihhlo leh ralthuam leh thil dang ṭha lo kuhva bag-a dah tel a nih kan ring lo hulhual a. Hetiang hi kan lirthei enkawlah man a awm reng reng kan la hre ngai lo," an ti.

Ramria awm an nih avanga an hamṭhatna neih ve chu chhungkaw tam tak ei bél a nih avangin, a tawp mai lohna turin an theihna kawng apianga hmalak zel an tum thu an tarlang bawk.

Champhai DC sawn duhtu lirthei pawl parukte
Champhai District Truck Owners Association
Mizoram Truck Drivers Association Champhai Sub-Hqrs
Champhai 407 Truck Owners Association
Champhai 207 Owners Association
Champhai District Tipper Owners Association
Champhai District Border Trade Transport Union