Makeshift hospital sakna tur sum pe

Central Warehousing Corporation (CWC) Regional Office, Guwahati hotute chuan nimin khan Mamit DC Dr Lalrozama chu a chenna inah an kâwm a, Covid-19 damlo enkawlna, makeshift hospital sak nan cheng nuai 10 an pe.

Makeshift hospital sakna atan hian cheng nuai 20 ruahman a ni a, CWC chuan nimin khan first instalment atan cheng nuai 10 an pe a ni.

CWC hotute chuan, Mamit district chu district chawi kân ngai a nih angin Covid-19 veite enkawlna sakna turin pawisa chu an pe tih an sawi a; Mamit district chu warehousing infrastructure lama tihhmasawnna atan warehouse (kudam) sakna tur ram ruak national highway emaw, rel kawng emaw bulah ram acre 2-3 vel an mamawh thu Bawrhsap hrilhin, ram a ngaihtuahpui theih chuan a man pawh inbiakremna anga pek an inhuam thu an sawi.